Qinikkat inuusuttut inatsisartuinut malinnaalit
Inuusuttut inatsisartuini ataasinngorpamiit ataatsimiilersussaniit peqataasussap Ib Uldummip kajumissaarutigaa qinikkat inatsisartuni ilaasortat malinnaanissaat, taama amma kajumissaaruteqarpoq inatsisartut siulittaasuat Jonathan Motzfeldt.
Ib Uldummi inuusuttut inatsartui 2003-mi ataatsimiimmata oqaluuserisat pillugit oqarpoq annguttoqarlunilu anngutinngitsoortoqartoq, Ibip isumaa malillugu nunamik piginnittussaanermut apeqqut inuusuttut inatsisartui kingullermik ataatsimiikkamik oqaluuserisimasartik nammineq siulliuffigisimasartik ullutsinni suli kikkunit tamanit oqaluuserineqartoq. Siunnersuutillu ilaat pipallalluni suliaasimasarmata oqaluuserineqanngitsoortartut.
Ib Uldum nassuiaavoq ilinniartut aningaasarsiaqarnerannut tunngasut kingullermik oqaluuserisassanngortitatik iluamik anngussimanngitsut. Maanna ataatsimiinnissami Demokraatit tunuliaqutaralugit ataatsimeeqataaniarpoq, neriuutigaalu oqaluuserisatik qinikkanit tusaaneqarlutillu iliuuseqarfigineqassasut.
Ib Uldum isumaqarpoq maanna qinikkat tusarnaarluartariaqartut, naammassinerminiillu inerniliussaq allaganngorlugu saqqiummeqartussaq atuarluarneqassasoq, inuusuttut inatsisartuini ataatsimeeqataasussaq Ib Uldum oqarpoq. Inatsisartut siulittaasuat Jonathan Motzfeldt oqallinnernut malinnaasussaq pisussamut pissangalluni malinnaaniarpoq, kajumissaarutigaalu qinikkat nuummiissimagunik malinnaaqqullugit.
Inuusuttut inatsisartuini ataatsimeeqataasussat sulillutik aqagu aallarteriissapput, tullianilu sisamanngorpat ataatsimiinneq naassaaq.