Qinikkat inissitsiterput
Sinerissami kommunini 18-ini kommunalbestyrelsit nutaat ulluni makkunani inissitsitileruttorput, inissitsiternerillu takutissavaat kommunini kikkut tamatumuuna pissaaneqarnerulernersut. Ivittuut kommunianni nalinginnaasumik partiilersortoqarneq ajorpoq. Kommunelli sinneri qimerluuataalaariartigik:
Siumut 10-nik borgmesteriutitaqalissaaq, Atassut sisamanik Inuit Ataqatigiillu ataatsimik borgmesteriutitaqalissallutik. Taakku saniatigut partiit avataanni inissisimasut marluk borgmesterinngussapput. Partiit sinerissami agguataarnerat qinigaaffimmut kingullermut naleqqiullugu allannguuteqarpallaanngilaq, taamaattorli Atassutip sisamanik borgmesteriutitaqalernera qinigaaffiup siulianut naleqqiullugu siuariarsimallutik. Inuit Ataqatigiit borgmesteriutitaat ataatsimik ilanngarput, ilaatigut Inuit Ataqatigiit Aasianni amerlanerussuteqarnerigaluat ajalusoormat borgmesterinngortitsisinnaanerigaluat iluatsinngitsoorpoq, kommunalbestyrelsemut isertitaat avissaartuutilermata ikinnerussuteqalerlutik. IA-mit anilluni attaviitsunngortoq Enok Sandgreen taamaalilluni Siumut Atassullu suleqatigalugit borgmesterinngorpoq.
Partiit suleqatigiinneri aamma qimerluuataalaaraanni qinigaaffimmut kingullermut naleqqiullugit allaanerulaartumik inissipput.
Sisimiuni Siumumeersup Hermann Berthelsenip borgmesterinngortinneqarnissaanut partiit kikkut tunuliaqutarineqarnersut suli tusarliunneqanngilaq, tassuugunnguarli nalunaaqutaq ataatsimut pisortatigoortumik ivertitsisoqassaaq. Borgmesterinngortussap partiinik suleqateqalersimanerluni aamma oqaaseqarfigiumanngikkallarnerarpaa.
Nuna tamakkerlugu eqqarsaatigissagaanni Siumut aamma Inuit Ataqatigiit borgmesterinngortitsinissamik isumaqatigiissuteqartut amerlanersaapput, Siumut aqqanileriarluni Inuit Ataqatigiillu quleriarlutik borgmesterinngortitseqataassallutik. Kommunini qulini Atassut borgmesterinngortitseqataasimavoq, Demokraatillu marloriarlutik. Demokraatit suleqataaffigisaat tassaapput, Narsaq aamma Qasigiannguit, taakkunanilu Siumut aamma Inuit Ataqatigiit suleqatigineqarput.
Kommunini tallimani Siumut aamma Inuit Ataqatigiit kisimiillutik suleqatigiipput. Upernavimmi, Qeqertarsuarmi Illoqqortoormiunilu assersuutigalugu Atassut Inuit Ataqatigiillu suleqatigiilersimapput, Narsamili Kangaatsiamilu Siumut Atassullu amerlanerussuteqarlutik borgmesterinngortitsisimallutik.
Nuummi kommunalbestyrelsip pisortatigoortumik inissitsiternissaa suli ullulerneqanngilaq, kommunilli sinnerini tallimanngorpat tamarmik inisseriissallutik. Qinigaaffimmi kingullermi arnaq ataaseq, tassalu Agnethe Davidsen borgmesterinngorpoq, maannali arnat sisamat borgmesterinngortinneqartussanngorlutik.
