Qinikkat inissitsiternerat ukiut sisamat atuuttussaavoq
Per Berthelsen isumaqarpoq, ikaarsaariarnermi ataatsimiititaliap siulittaasuanik Asii Chemnitz Narupimik namminerminillu illuatungiliuttut isornartorsiuinerat isornartorsiuiniarnerinnaasoq. Naak Demokraatit perulluliornerat illuatungiliuttut nipituuliuutigimmassuk paasisinnaalluaraluarlugu.
Taassuma erseqqissarpaa kommuninut qinersisarnerni malittarisassat malillugit kommunimi qinikkat inissitsiternerat – borgmesterip tullia siulleq ilanngullugu – qinersivik tamaat atuummat, tassa inissitsiternerat 2013-ip tungaanut atuuttussaammat.
Per Berthelsenip aamma oqaatigaa, massakkut Asii Chemnitz Narupip sulinngiffeqarnerata nalaani ikaarsaariarnermi ataatsimiititaliami siulittaasuugallarami, maannalu ikaarsaariarnermi ataatsimiititaliap aggustip aallaqqaataani ataatsimiinnissaa piareersaleruttorini. Taamaattorli Per Berthelsen aggustip aallaqqaataani ataatsimiinnermi peqataasinnaannginnerarpoq, tassa Nuuk Imermi siulersuisuni siulittaasutut februaarimili pilersaarutigineqareersutut Sisimiunut ataatsimiigiartussaagami, taamaattumik aggustip aallaqqaataani ataatsimiinnissami sinniisussani ataatsimeeqataassasoq.