Qinikkat ileqqorisaarnissaannik inatsisiliortut
Nunatsiavut, naggueqatigiit Inuit nunagaat, Paggivittap avannamut kangisissuaniittoq, namminersornerulluni ingerlatsiviusoq.
Ileqqorissaarnissamut inatsit nutaaq naapertorlugu innuttaasut, politikerinik, kikkut tamat takkuanni aalakoorlutik allatulluunniit aanngajaarniutinik atuisut pissusiluttutut unnerluutigineqarsinnaapput, akisussaatinneqarsinnaallutillu.
Taamaalilluni Nunatsiavummi naalakkersuisunut siulittaasuugallartup, Tony Andersenip akisussaaffigisussanngorpaa, qinikkat pissusilersuutitik pillugit akisussaassuseqarnissaat, qinikkallu qinersisitik sinnerlugit sulisussaammata maligassiuisussaallutillu.
Paggivittami, tassa Labradorimi atornerluinerujussuaq pillugu nalunaarusiortoqareersorlu inatsisartut nutaamik maleruagassiorput.
Naalakkersuisut siulittaasuat William Andersen pingajuat, kinguaassiuutitigut atornerluisimasutut unnerluutigineqarnermi kingunerisaanik tunuartitaavoq.
Inatsit naapertorlugu qinikkat angerlarsimaffimminni sulerinerat akuliuffigineqassanngilaq, politikerili kikkunnilluunniit takuneqarsinnaasumi ileqqorissaanngippat, akiliisitaanermik imaluunniit Nunatsiavummi inatsisartunit tunuartitaanermik kinguneqarsinnaavoq, naalakkersuisut siulittaasorigallagaat Tony Andersen, CBC-News-imut taama nassuiaavoq.