Qinigassat krydsileriaannaassapput
Kommunalbestyrelsinut qinersinermi taasivissat aternik allttuiffiunatik kryds-iliinnariaassapput. Taamaalillutik taasiviit atorsinnaanngitsut ikinnerunissaat naatsorsuutigineqarpoq.
Kommunabestyrelsinut ilagiillu sinniisaannut apriilip 5-anni qinersinissamut qinigassanngortittut aqqi tamakkerlutik ullumi saqqummiunneqarput. Taamaalillutik aamma pappialat taasivissat piareersarneqarsinnaalerput. Ukioq manna nutaaliortoqarpoq, tassa inatsisartunut qinersinerni pisarnertut qinigassanngortittut aqqi taasivissami allassimariissapput.
Namminersornerullutik Oqartussat nunami namminermi pissutsinut allaffiani pisortap Leif Scharlingip oqarnera naapertorlugu nunatsinni angallannikkut pissutsit pitsanngoqimmata taasivissat ulloq qinersivissaq nallertinnagu apuussimanissaat naatsorsuutigineqarsinnaavoq.
- Sumiiffiilli ilaannut apuutinngitsuussagaluarpata taasivissat pisoqqat atorneqarsinnaapput, Leif Scharling erseqqissaavoq.
Qinigassat atiisa allassimareernissaat allamik aamma iluaqutissartaqarpoq. Taasinerit naatsorsorneqarnerat pilertornerusumik naammassineqarsinnaavoq taasiviillu atorsinnaanngitsut ikinnerussapput.
Kommunalbestyrelsinut kingullermik qinersisoqarmat, 2001-mi, taasiviit atorsinnaanngitsut 300-ngajaapput, taasinerit katinnerisa 1 procentii sinneqarlutik.
-Inuit ilaasa allattaasiat atuaruminaassinnaasarpoq, ilaannilu takuneq ajornartarpoq inuk kina taaneqarsimanersoq. Atit allasimareernerisigut ajornartorsiutit taamaattut qaangerneqarsinnaapput, Leif Scharling oqarpoq.
Allamilli aamma pitsaaquteqarpoq. Qinersivinni inukinnerusuni kikkut kimik taasisimanerat takuneqarsinnaasarpoq, inuit ikittunnguit imminnut ilisarisimalluartut allatsaatsinik ilisarsisinnaasarmata. Atit allassimareernerisigut kia kina qinersimaneraa takuneqarsinnaajunnaassaaq.
Ilagiit sinniisaannut qinersinermi qinigassat taasivinni allassimariissanngillat, qangatut atit nammineq allanneqassallutik.
Kommunalbestyrelsinut qinigassanngortittut 2001-mi qinersinermut naleqqiullugit 51-nik amerlanerullutik katillutik 620-iupput.
