Qinigassanngortittut ualeru nalunarunnaassapput

Februaarip 8-anni Folketingimut nunatsinni qinersinissamut partiit ilaasa qinigassanngortitassatik suli piareersimanngilaat. Siumut Demokraatillu kisimik qinigassanngortitassaminnik nalunaaruteqareerput, sinnerisalu qinigassanngortitassaat kikkuussanersut ualeru nalunarunnaassasut ilimasaarutigineqarpoq.

Demokraatit tamatumuuna marlunnik qinigassanngortitsipput, partiillu siuttuisa marluk, siulittaasup Per Berthelsenip tulliatalu Palle Christiansenip Folketingimi issiaviit aappaat tiguariaraluassavaat. Siumup sisamat sassartipai, massakkut ilaasortaasoq Lars-Emil Johansen, naalakkersuisuni ilaasortaasimasoq Marianne Jensen, inuusuttullu marluk, Doris Jakobsen aamma Ole Aggo Markussen.

Inuit Ataqatigiit siulersuisuunerisa qinigassanngortitassatik ualeru saqqummiutissavaat, qinersinissarli tusatsiakkatut tusarsaalermalli massakkut ilaasortaasoq Kuupik Kleist qinigassanngorteqqinniarluni nalunaareerpoq. Kikkut sassaqatigissianerai siulersuisuunerit ualeru aalajangiiffigissagaat, partiit allaffeqarfianiit ilisimatitsissutigineqarpoq.

Atassutip aamma qinigassanngortitassani ualeru nalunaarutiginiarpai. Iluarsisassat kingulliit aaqqeriarpata piariissaagut, partiip siulittaasua Augusta Salling, nammineq sassartussat akornanniissagunavissoq, ilisimatitsivoq.

Kattusseqatigiit tamatumuuna sassartitaqassanerlutik suli aalajanginngillat. Kattusseqatigiit siuttuat Anthon Frederiksen ullaa-tungaa ilisimatitsivoq Folketingimut qinigassanngortitsissanerlutik ullumi aqaguluunniit nalunarutigiumaarlugu.

Kingullermik Folketingimut qinersisoqarmat, novembarimi 2001-mi, qinersisinnaasut 61 procentii qinersiartorput, taaguunneqarnerpaallu sisamat tassaapput Kuupik Kleist, 6369-nit taaneqartoq, normu 2-julluni Lars-Emil Johansen 5093-nit taaneqartoq, normu 3-uvoq Ellen Christoffersen, taamani Kristenseniusoq, 4083-nit taaneqarluni normu 4-aallunilu Per Berthelsen 3654-nit taaneqartoq.