Qinigassanngortittut nalornisitsiniartutut ilaatigut nalilerpai
Kommunit kattunnissaanut qinersinermi partiip Siumup qinersisui procentinik arfineq-marlungajannik ikileriarput, tamatumunngalu politikerit qinersisartunik nalornisitsiniaallutik oqalunnerarlugit Hans Enoksenip kinguariarnermut pissutaatippaa.
Allattoq Mads Lynge
apriilip 09-at 2008 16:47
- Pakatsissutiginngeqaara qinersisigut ikileriarmata. Allannguiniarneq taama annertutigisoq, aammalu ilaatigut politikerit nalornisitsiniaallutik qinersisartunut annertuumik oqalunnerat soorunami aamma nalornilersitsinermik kinguneqarpoq. Assakaasoq assakaalereersoq kinguarsaqqinneqarsinnaanngilaq. Taamaammat partiillu allat suleqatigiilluarnissarput kissaatigaara, innuttaasut sullinneqarnerat matumani pineqarmat, partiit ataasiakkaat anguniagaat pineqaratik, Hans Enoksen oqarpoq.
Kujataata qinersiviani Siumup borgmesterinngortitsinissani qulakkeeqqavaa,
nunattali sinnerani partiinik allanik suleqateqarluni borgmesterinngortitsinissani naatsorsuutigissavaa.
