Qinigassanngortittut kikkuuneri tamanit takuneqarsinnaalerpoq

IA-mit Kattusseqatigiinnillu qinigassanngortittut ippassaq saqqummiunneqareersullu, ukioq manna qinigassanngortittut 205-iusut kikkuuneri takuneqarsinnaanngorput.

Qinersineqalernerata tungaanut eqqartorneqarsimasut ilaat tassaavoq qinigassanngortittuni arnat qassiuneri.

Naatsorsuipallanerup takutippaa arnat qinigassanngortittut amerliallalaarsimasut.

2002-mi qinersisoqarmat qinigassanngortittut 21 procent-ii arnaapput – ukioq mannali 24,8 procent-iullutik.

Kisitsisinngorlugit takutissagaanni, 2002-mi arnat 42 qinigassanngortissimapput, ukioq mannali 51-iullutik.

Arnat qinigassanngortittut siornatigornit amerliallasimanerannut peqqutaaqataavoq IA sinnerlugu qinigassanngortittut arnartaqarnerujussuat.

IA-mut qinigassanngortittut 48-pput taakkunannga arnat 21-viullutik, tassalu 43 procent. IA-miit arnat qinigassanngortittut siorna 34 procentiusimagaluarput.

Siumut-miit qinigassanngortittut arnat aamma amerliallannerulaarsimapput. Siorna 13 procent-iusimapput ukioq manna 18 procent-iullutik.

-Neriuppunga qinersisoqareerpat arnat naalakkersuisut amerliallasimassasut, arnalli tunngavilersuillaqqissuusariaqarput anguniagartuusariaqarlutillu. Naligiissitaanissamut Siunnersuisoqatigiit misissuinerata takutippaa inuit isumaqartut arnat politiikerit amerligaangata atukkat pitsaanerulersartut, taama oqarpoq naligiissitaanissamut siunnersuisoqatigiinni ilaasortaq Karna Jokumsen.

Qinigassanngortinniarluni sassarnissamut periarfissaqarpoq oktober-ip 25-ta tungaanut, arnallu amerlanerit qinigassanngortinnissaminnut suli periarfissaqarput.