Inatsisartunut qinersisoqalerpat IA-kkut qinigassanngortitassaanni inuusunnersaagaluartoq qinigassanngortissinnaanngitsoq ullumi nalunaarutigineqarpoq.
18-inik ukiulik Jane Petersen Aasianneersoq qinigassanngortissinnaanermi inatsimmi piumasaqaatit naammassisimannginnamigit tunuartariaqalerpoq.
Jane Petersen Danmarkimi efterskolereerluni nunatsinnut aasaq angerlarpoq.
Nunatsinni qaammatini arfinilinni najugaqarsimasutut allassimanissamik piumasaqaat naammassisimannginnamiuk, immikkut akuerineqarnissaminik qinnuteqartussaavoq.
Oktobarip ulluisa sisamaat nallertinnagu kommunimut saaffiginnittussaagaluarpoq.
18-inilli ukiulik iluatsitsinngitsoorpoq.
Jane Petersen Radioaviisimut oqarpoq, pisut naammaginartinngivikkini.
- Kommunip ilisimatissimanngimmanga ilumoorsinnaanngilaq, Jane Petersen oqarpoq.
Tusagassiutinut nalunaarutikkut IA oqarpoq, qinersinermi inatsisit eqaannerusunngortinneqarnissaat sulissutiginiaritsik.
