Qinigassanngortittut 334-t piareerput
Namminersornerullutik Oqartussani nunami pissutsinut allaffeqarfiata kommunalbestyrelsenut nutaanik qinersinissamut atatillugu aqqit 334-it, qinersivissat pappialassartaannut krydsiliiffissanut naqitigassanngorlugit nassiuppaat. Ullut 14-t qaangiuppata, apriilip ulluisa arfineq-pingajuanni qinersisartup taaniakkami inuup aqqa imaluunniit partii qinerniakkani krydsilersinnaavaa, taama oqarpoq Leif Scharling. Qinigassanngortittut kikkuuneri aqqisalu qanoq allanneqartarneri sapaatip-akunnera kingullerni paasiniarneqarpoq.
Aqqit nalunaarutigineqartut malillugit Kujataata kommunissaani 58-it, Kangia-Kitaata kommunissaani 116-it, Qeqqata kommunissaani 41-t kiisalu Avannaata Kommunissaani 119-it qinigassanngortipput.
Nunami pissutsinut allaffimmit naatsorsuutigineqarpoq pappiaqqaat taasivissat arfininngorpat nassiussuunneqalissasut.
Piffissaagallartillugu taasivissat apuutinngippata taasivissat qangarnisat atorneqassasut, Leif Scharlingip ilanngullugu oqaatigaa.
Allakkatigut qinersineq februaarip ulluisa 26-aniilli periarfissaalereersoq suli ingerlavoq. Tamatumani pineqarput, qinersisartut ullormi qinersivimmi angerlarsimasinnaanngitsut, inuup partiilluunniit aqqanik allakkatigut taasisinnaatitaasut.
