Qinigassanngortittoq qinersisinnaatitaananilu qinigassanngortissinnaasimanngilaq

Sisimiuni kommunalbestyrelsemut qinersineq naammassivoq, qinigassanngortittulli ilaat qinersisinnaananilu qinigassanngortissinnaasimanngitsoq ippassaq ulloq qinersivimmi aatsaat paasineqarpoq.

Sisimiuni namminersortoq, pequtaarniarfiutilik pizzaliorfiutilillu 26-nik ukiulik Malik Berthelsen qinigassanngortittut allat assigalugit pissangalluni Siumut sinnerlugu qinigassanngortissimavoq.

Ippassarli ullormi taasivimmi taasiartorami tupaallatsinneqarpoq, kommunemit paasitinneqarami, qinersisinnaatitaasut allattorsimaffianni allassimanani allaallu qinigassanngortissinnaasimanani, naak qinigassanngortittut aqqisa akornanniikkaluarluni.

- Pakatsinartorujussuuvoq, utoqqatseraluarpunga taama oqarama kisianni tupinnaqaaq. Tupinnaqaaq, taama eqartigisumik inatsiseqarmat, danskit tuluillu oqaasiinik qaammatit marluk Danmarkimut pikkorissarnera pissutigiinnarlugu sullissisinnaanngitsutut nalilerneqarama. Malik Berthelsen oqarpoq.

Malik Berthelsenip taasiartorneratigut kommunep aatsaat paasisimavaa kukkusoqarsimasoq, taamaalimmallu Namminersornerullutik Oqartussani Qinersinermi Ataatsimiititaliaq ippassaq ualikkut aalajangerpoq, Malik Berthelsenip piumasaqaat qaammatini arfinilinni kommunemi najugaqartussaatitaaneq sapaatip-akunnerata missaanik naammassisimanngimmagu taasisinnaatitaananilu qinigassanngortissinnaatitaassanngitsoq.

Qinersineq aamma aallartinneqareermat unitsinneqassanngitsoq Qinersinermi Ataatsimiititaliaq aalajangersimavoq, qinersinerlu naammassimmat taasisai 215-it partiimut tunuliaqutaanut Siumumut tunniunneqassasut aalajangersimallutik ataatsimiititaliami siulittaasoq Kaj Kleist nassuiaavoq.

Taasisartut kukkusoqarsimanera pillugu ilisimatinneqarsimanerlutik ?

- Taamaalisinnaanerluta allaallu aqqata allassimaffinninngaannit peerniarlugu eqqartoraluarparput, kisianni qinersinerup eqqissisimasumik ingerlanissaa pillugu taamaaliorniarnata aalajangerpugut. Kaj Kleist nassuiaavoq.

Sisimiut Kommuneanni borgmesteri Hermann Berthelsen oqarpoq, qinersinerup inernera qinersinermi siulersuisut amerlanerussuteqartut akuersaaraat, kukkusimanerlu ajuusaarutigalugu. Inernerali akueriumanagu Demokraatit sinnerlugit kommunalbestyrelsemut ilaasortanngortup Palle Christiansenip nalunaarutigaa, naammagittaalliuteqarnissarlu siunertaralugu Atassut Inuit Ataqatigiillu ualeru sisamanut ataatsimeeqatiseralugit erseqqissaatigalugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat