Qinigassanngortittoq misilittagalinnut nallersuunneqarusunngilaq
Siumumi ilaasortat ilaata, ippassigami partiip Folketingimut qinigassanngortitai isornartorsiorpai nikussaarsinnaannginnerarlugit, Folketingimilu suliassamik kivitsisinnaannginnerarlugit.
Inuit Ataqatigiit qinigassanngortitaat tallimat IA-p qinigaaffinni kingullerni folketingimi ilaasortaatitatut, tassa Kuupik Kleistitut aamma Juliane Henningsenitut piukkunnassuseqartiginersut IA sinnerlugu qinigassanngortittut ilaata ima isumaqarfigaa:
- Taamatut oqaatigineqarsinnaanngitsut isumaqarpunga. Kuupik Kleist aamma Juliane Henningsen qinigaalluartaqaat, taakkununngalu angummanniarluta ilungersortariaqarpugut. Taamatullu angusaqarniarluta ilungersornissarput qularutigineqassanngilaq, Nikoline Ziemer oqarpoq.
Taassuma ukiumi matumani kingusinnerusukkut folketingimut qinersinissami IA-mit qinigassanngorteqatigai Sara Olsvig, Kaali Olsen, Sofia Rossen aamma Johan Lund Olsen.
- Siumup qinigassanngortitai akerleriissutaasut tusatsiarpavut, tassa ilaasortaasa ilaannit naammagittaalliuutigineqarlutik. Isumaqarpunga tamanna uggornalaartoq. Qinigassanngortinninnut atatillugu pilluaqqusisorpassuaqarpoq, tamannalu qujassutigeqaara, Nikoline Ziemer oqarpoq.
