Qinigassanngortinniarunnaarpoq

Rasmus Frederiksen parteeqataasa ilisimatissimanngilaat siumumiit qinigassanngortittussat inuit 62-t akornanni allassimanngitsoq taamalu qinigassanngortissinnaanngitsoq, Rasmuusillu qinigassanngortinnissamut piukkoornerigaluani allanngortiinnarpaa.

- Ippassaq aatsaat tusagassiutitigut tusarpara siumut tunuliaqutaralugu qinigassanngortittussatut piukkussat akornanni atera ilaanngitsoq, tamanna soorunami uannut nuanninngilaq, Rasmus Frederiksen oqarpoq.

Taanna erseqqissaavoq

Taamatuttaaq Naalakkersuisut marluk qinigassanngortinnginnissaannik isuma Rasmus Frederiksenip tusarsimanngilaa

- Aamma taamatulli ilisimatinneqarsimanngilanga siulersuisut qangali aalajangersimammata, Naakkersuisut marluk ilassinninnermut atugassanik aningaasanik atuivallaarsimanertik pillugu qinigassanngortissinnaanngitsut, Rasmus Frederiksen oqarpoq.

Rasmus Frederiksenili erseqqissaavoq, taama aalajangertoqarsimanera ataqqigini.

Taamali ilisimatitsisimannginneq ilumoornersoq Hans Enoksenimut apeqqutigaarput.

- Oqaatigissavara Sisimiunut saaffiginnissutaa Sisimiuni siulersuisut isummerfigereermassuk. Aammalu taakku innersuussutigaat Rasmus Frederiksen inassutigineqassanngitsoq, Hans Enoksen oqarpoq.

Nangipporlu:

- Soorunami immikkoortortaqarfiit innersuussutaat sapinngisamik aallaaviginiartussaagatsigit taanna malissimavarput, oqarpoq.

Apereqqipparput inuttaa ilisimatissimaneraat.

- Saaffiginnittut akuerineqartut akuerineqanngitsullu tamarmik allaffigineqartussaapput, massakkullu taakkua suliarineqarput, Hans Enoksen oqarpoq.