Qinigaasut qinigaaqqinngitsoortullu
Inatsisartunut ippassaq qinersinermi ilaasortanngortut 31-it nutaartaqarput aammali ilaasortaasimasut qinigassanngorteqqikkaluartullu ilaat qinigaaqqinngitsoorlutik.
Atassummi qinigaanerpaavoq siulittaasoq Finn Karlsen, 1133-init taaguunneqartoq, qinigaanerpaallu allattorsimaffianni nr. 4-inngortoq.
Atassummi ilaasortanngoqqipput Ellen Christoffersen aamma Augusta Salling, nutaatut qinigaallutik Sivert K. Heilmann, Godmand Rasmussen aamma Thomas Kristensen.
Demokraatinit Inatsisartunut qinigaapput siulittaasuat Per Berthelsen, 2877-init tassa amerlanerpaanit taagunneqarluni qinigaanerpaat allattorsimaffianni ajugaasoq.
Demokraatinissaaq qinigaaqqipput Palle Christiansen, Marie Fleischer aamma Astrid Fleischer Rex, nutaatut qinigaalutik Jens B. Frederiksen, Lene Knüppel aamma Esmar Bergstrøm. Demokraatinit Inatsisartunut qinigassanngorteqqinngilaq Per Skaaning.
IA´p siulittaasua Josef Motzfeldt qinersinermi taagunneqarnerpaani pingajuuvoq 1629-init qinerneqarsimalluni.
IA-mit aamma inatsisartunngorput; Asii Chemnitz Narup, Kuupik Kleist, Agathe Fontain, Ane Hansen aamma Johan Lund Olsen, inuusuttoq Juliane Henningsen nutaatut iserluni. Aqqaluk Lynge Henriette Rasmussenilu qinigaaqqinngitsoorput.
Kattusseqatigiit Partiiani siulittaasup, Anthon Frederiksenip Inatsisartuni inini tigummiinnarpaa, Anthon Frederiksen 535-init taaguunneqarpoq.
Siumumi taaguunneqarnerpaavoq partiip siulittaasua, Naalakkersuisuungallartullu siulittaasuat, Hans Enoksen, 2224-init taaguunneqarluni taagunneqarnerpaamut tulliusoq.
Taassuma saniatigut Siumumit qinigaaqqipput; Doris Jakobsen, Jonathan Motzfeldt, Jørgen Wæver Johansen aamma Ruth Heilmann, nutaatut qinigaallutik Lars-Emil Johansen, Aleqa Hammond, Agnethe Davidsen, Kim Kielsen aamma Vittus Mikaelsen. Siumut sinnerlugu qinigassanngorteqqikkaluarlutik qinigaanngitsoorput, Simon Olsen, Ole Dorph, Enos Lyberth, Otto Jerimiassen, Per Rosing Petersen, Ole Thorleifsen, Kalistat Lund aamma Isak Davidsen.
Inatsisartunut ippassaq qinersiartortut 74,9 procentiusimapput. Inatsisartunut kingullermik 2002-imi qinersisut 74,6 procentiusimallutik.
Ippassaq qinersisut katillutik 28.881-simapput.
Qinersinermi Atassut arfinilinnik Siumut qulinik, Demokraatit arfineq-marlunnik Inuit Ataqatigiit arfineq-marlunnik kiisalu Kattuseqatigiit Partiaat ataatsimik Inatsisartuni ilaasortaatitaqalerput.
