Qinigaasut pingasut nutaat qinigaanerat atorunnaarsinneqarpoq
Kommunalbestyrelse-mut qinigaasut pingasut allat nutaat qinigaanerigaluat atorunnaarsinneqarpoq.
Taamaalilluni nuna tamakkerlugu inuit arfinillit qinersinermi kingullermi qinigaanerigalui atorunnaarsinneqarput.
Siullermik Jensine Berthelsen Nuummi Atassummit qinigaasoq qinigaasinnaanermut ataatsimiititaliamit qinigaanera atorunnaarsinneqarpoq. Ippassarlu Upernavimmi kommunalbestyrelse-mut qinigaasuugaluit marluk, ukiut kingulliit tallimat iluini pineqaatissinneqarsimanertik pissutigalugu qinigaanerigaluat qinigaasinnaanermut ataatsimiititaliamit aamma atorunnaarsinneqarlutik.
Ippassarlu kingullermik ataatsimiinnerminni pingasunik nassaaqqipput.
-Qinigaasut pingasut qinigaasinnaanngitsutut nalilerneqarput, tamarmillu illoqarfinnit pingasunit assigiinngitsunit aggersuupput. Taakku nalunaarfigineqaleruttorput, kommunillu piumaffigaagut sukkanerpaamik pissarsiariniaqqullugit, sinniisuilu kommunalbestyrelsinut ilaasortanngortut nalunaarfigeqqullugit, Leif Scharling Namminersornerulutik Oqartussani Nunami Namminermi Pissutinut Allaffeqarfimmi atorfilik oqarpoq.
Ullup ingerlanerani nalunaarutigineqassapput kikkut qinigaasinnaanngitsutut nalilerneqarsimanersut.
Siunissami inatsisit allanngortinngikkaluarlugit qinigassanngortitut qinigassanngortillutik nalunaarnerminni qinigaasinnaanermut ataatsimiititaliamut pineqaatissinneqarsimanerlutik misissuisinnaanerannik akuersissummik atsioqqaartalissapput, kommunalbestyrelse-nngortut nutaat ivertinneqarnissaat kinguarsaqqunagu.
Qinigaasinnaanermut Ataatsimiititaliap nunaqarfinni qinersineq ilagiinnullu qinersineq suliassatut tullinnguullugu aallartissavaat.
Komunalbestyrelse-mut ilaasortanngortut nutaat kingusinnerpaamik junip aallartinnerani ataasinngornermi siullermi ivertinneqassapput. Illoqarfiit ilaanni kommunalbestyrelse-nngortut nutaat pinse-rtinnagu ivertinniarput ilaalu pinse-p kinguninngua ivertinneqassallutik.
