Qinigaasinnaanngitsutut nalilerneqartut ilapput
Kommunimut qinersinermi kingullermi, qinigaasinnaatitaanngitsutut nalilerneqartut tallimanngorput.
Radioaviisimi ippassaani tusarliupparput Upernaviup Kommuneani qinigaasimasut marluk qinigaasinnaanngitsutut nalilerneqarsimasut, taakkulu pingasunik maanna ilaneqarput.
Qinigaasinnaatitaanngitsutut nalilerneqartut tassaapput IA sinnerlugu Nanortalimmi qinigaagaluartoq Ingemann Dorph, Paamiuni IA sinnerlugu qinigaagaluartoq Mona Kristoffersen, kiisalu Qaanaap Kommuneani Atassut qinigaagaluartoq Preben Petersen.
Ingemann Dorph 2001-imi novembariugaa Nanortallip eqqartuussivianit persuttaasimasutut eqqartuunneqarpoq.
Mona Kristoffersen ikiaroornartumik nassinneqarsimasutut Paamiut politiivinit akiligassinneqarsimammat, qinigaasinnaatitaanngitsutut nalilerneqarpoq.
Kiisalu Preben Petersen imigassartorsimalluni biilersimanini pissutigalugu Qaanaap politiivinit akiligassinneqarsimavoq, taamaalillunilu qinigaasinnaatitaanngitsutut nalilerneqarluni.
Taamaalilluni qinigaasinnaatitaanngitsutut nalilerneqartut katillugit tallimanngorput.
Qinigaasinnaatitaanermut ataatsimiititaliaq aqagu ualikkut ataatsimeeqqissaaq.
