Qinigaaqqipput

Nunatsinni Folketingimut qinersineq piareerpoq, tamatumuunalu Siumut Inuit Ataqatigiillu qinersinermi ajugaaqqipput.

Nunarput sinnerlugu Folketingimi qinigaaqqipput Siumumeersoq Lars-Emil Johansen 4774-inik taaguunneqartoq kiisalu IA-meersoq Kuupik Kleist 5168-inik taagunneqartoq.

Kuupik Kleist qinersinermi taaguunneqarnerpaatut inissippoq. Tassunga tulliuvoq Lars-Emil Johansen, taaguunneqarnerpaallu pingajuattut inissippoq Demokraatit siulittaasuat Per Berthelsen, 3337-inik qinerneqarsimavoq.

Qinersinermi ippassaq Siumut partii taaguunneqarnerpaavoq katillugit 7741-inik qinersiseqarluni. Tulliuvoq Inuit Ataqatigiit 5651-inik taaguunneqartut, pingajuattut inissipput Demokraatit 4906-inik taaguunneqartut. Kattusseqatigiit qinernikinnerpaapput 841-inik qinerneqarsimallutik.

Folketingimut qinersinermi qinersisartut 59,3 %-ii qinersiartorsimapput. 2001-imi qinersisartut 61,5 %-ii qinersiartorsimallutik.

Nuummi qinersinermi qinersisartut 58%-ii qinersiartorsimapput, 2001-mi 63 %-iusimallutik.

Upernavimmili siuariartoqarpoq, qinersinermi qinersisartut 60 %-ii taasisimapput, 2001-imi 54 %-iusimallutik.