Qinigaaqqinngitsoortoq

Sisimiuni kommunabestyrelsemut qinerseqqinnerup inernerata takutippaa, Atassut sinnerlugu Apriilip tallimaani qinigaasimagaluartoq Søren Alaufesen, ippassaq qinersinermi isinngitsoortoq. Tamanna inuttaata uggornartoqartippaa.

- Soorunami uggornarpoq taamatut inissinnera, qinersisartulli taamatut aalajangersimanerat ataqqivara, Søren Alufesen oqarpoq nangillunilu;

- Qinerseqqinnissaq Atassummiit isumaqatigisimavarput, pissutigalugu inatsisit tunngaviusut najoqqutaralugit pisoqarnissaa qulakkeersinnaaqqullugu.

Taama oqarpoq Søren Alaufesen. Demokraatit Sisimiuni siuttuat Palle Christiansen oqarpoq allanngungaartoqanngikkaluartoq malittarisassat malillugit qinersinerup tamatumuuna ingerlanneqarnera naammagisimaarlugu. Qinersinerullu inernera Palle Christiansen-ip tusaatissatut tiguaa.

- Neriussimagaluarpugut qinersinermi inernerit allannguallakkumaartut, taamaattoqanngilarli, taamaammat qinersinerup inerneri tusaatissatut tiguagut, Palle Christiansen oqarpoq, nangillunilu;

- Erinigeqaarput kommunalbestyrelsemi nutaami sulilernissarput. Qinersinermi kingullermi inuit amerlanerusut qinersiartorsimagaluarput, neriussimagaluarpungalu inuit allanngortitserusullutik qinersiartorsimassasut, taamaattoqarsimanngilarli, kisianni inuit taasisimanerat ataqqivarput, maannakkullu siunissaq eqqarsaatigalugu sulineq aallartissaaq, Palle Christiansen oqarpoq.

Hermann Berthelsen ullaaq radioaviisimut oqarpoq Demokraatit suleqatiserinnillutik ornigussinnaasut.

- Partiit allat aamma periarfissaqarput uagutsinnut saaffiginnissinnaallutik. Taakku anguniagaat uagutsinnut qanttuuppata, soorunami oqaloqateqarsinnaavugut. Taama oqarpoq Sisimiuni borgmesteriugallartoq Hermann Berthelsen. Taamak oqarsinnaaneq Palle Christiansenip uparuarlugu ima oqarpoq.

- Siumut oqaannarsinnaanngilaq uagut aggerluta suleqatiserinnissasugut. Siumup partiia uani qinersinermi amerlanerussuteqarpoq, taannaasariaqarporlu suleqatiserinnilluni uagutsinnut saaffiginnittussaq. Suleqatiserinninnerit tusagassiutikkut nalunaarutiserineqaratik komunal bestyrelsep iluani eqqartorneqartussaapput, Palle Christiansen naggasiivoq.

Sisimiut kommuneani kommunalbestyrelsemut qinigaasimasut qinigaasinnaatitaanermut ataatsimiisitaliap akuerereerpagit, sapaatit akunneri pingasut qaangiuppata kommunalbestyrelse, siullermeerluni ataatsimiinnissa pisinnaassasoq Hermann Berthelsen oqarpoq.