- Qinertagara qinerniarpara

Folketingimut aqagu qinersisussanngorpugut. Qinersinissarlu sioqqullugu qinersartut isumaannik paasiniaavugut.
Aappariit Augustine aamma Niisi Svendsen Folketingimut aqagu qinersiartussamaarput. Augustinep qinertakkani qinerniarpaa. Assi © : KNR
juunip 04-at 2019 16:48

Nuummi innuttaasut aqqusinermi naapitavut qinersiniarnersut KNR-imit aperaagut, amerlanerillu qinersiniarput:

Birgitte Egede Larsen

- Qinersissaanga pingaartittarakku, Birgitte Egede Larsen akivoq, nangillunilu:

- Napparsimmaveqarfiit politeeqarfiillu soqutiginerullugit tusarnaassallugit qanoq sulissutiginiarneqarnersut.

Aappariit qinersiniartut aamma naapippagut:

- Soorunami Kalaallit Nunaat tamaat isigalugu ingerlatserusuttoq qinissallugu pileriginerusarpara. Aappaatigullu aamma meeqqanut siunissarisatsinnut ajunnginnerpaamik atugaqartitserusuttut qinissallugit aamma pileriginerusarpara, Niisi Svendsen oqarpoq.

Taassuma kina qinissanerlugu suli aalajanginngilaa, nuliatali Augustine Svendsenip kina qinissanerlugu aalajangiusimareerpaa:

- Qinertagara qinerniarpara, Augustine Svendsen oqarpoq.

Alla, ukiut 34-t matuma siorna nunatsinni najugaqalersimasoq, maani qinersisinnaanngoramili qinersiuiaannarsimasoq aamma naapipparput. 

Assi © : KNR

- Uanga isummannik assingusumik oqariartuuteqarsinnaasumik qinersissaanga, taamaammat partiit saamerliit qinersinnaavakka talerperlerniikkaluarlunga, Knud Østergaard oqarpoq.

Aqqusinermili naapitatsinni qinersinissaminnik qulartut aamma arlaqarput.

- Immaqa, ilimanarsinnaavoq. Malinnaaffigilluannginnakkit taamaammat naluara qinersissanerlunga, Sebastian Enequist oqarpoq.

Folketingimut qinigassanngortittut katillugit 20-upput. Folketingimulli qinigaassagaluarunik suunuku sorsuutiginiaraat? Tamakku uani akissutissarsisinnaavatit.