Qinersiviit arlallit eqquteqqinneqarnissaat kissaaatigineqarpoq
Inatsisartunut qinersisarnermi qinersiviup 1998-imi ataasiinnanngortinneqartup, qinersivinnut arlalinnut agguloqqinneqarnissaa, IA-mit siunnersuutigineqarpoq.
Inatsisartut pillugit inatsit allanngortinneqartoq, tassa qinersiviit arfineq pingasunngorlugit aggulussimasut ataasiinnanngortillugu 1998-mi inatsisartunit aalajangiiffigineqarpoq. Inatsit allanngortinniarlugu ualeru inatsisartut ataatsimiilerpata, IA sinnerlugu inatsisartuni ilaasortaq Kuupik Kleist siunnersuuteqassamaarpoq.
Qinersivinnik amerlanerulersitseqqinnissamut Kuupik Kleistip sinnersuuteqarnerminut patisilersuutigaa, qinersiviup ataasiinnanngortinneqarnerata kingunerigaatamat oqartussaaqataanerisa innarlerneqarsimanera.
Siunnersuut pillugu Naalakkersuisut siulittaasuata Hans Enoksen-ip akissuteqarnermini oqaatigaa, qinersiviup ataasiinnanngortinneqarsimanerata, tamat oqartussaaqataaneranik innarliinngitsoq, akerlianilli inatsisartut inatsisaata 1998-mi allanngortinneqarnerata siunertarigaa, Naalakkersuisut kommunellu akornanni suleqatigiinnerup nukittorsarneqarnissaa. Naalakkersuisut siulittaasuat isumaqarpoq inatisartunut qinersiviup ataasiinnaanngortinneqarsimanera tamat oqartussaaqataaneranik annertunerulersitsisimasoq.
Inatsisartut ualeru ataatsimiilerpata eqqartorneqartussanut ilaavoq, qinersisinnaanermut ukiut killigitinneqartut, tassa 18-nik ukioqarnerup, 16-nut appartinneqarnissaa.
