Qinersiviit amerlineqassanersut misissorniarneqalerpoq
Allattoq Mads Lynge
Nunatsinni arlalinnik qinersiveqaleqqinnissaa Inuit Ataqatigiinneersup Kuupik Kleistip siunnersuutaa inatsisartuni sisamanngormat oqaluuserineqarani ippassaq aatsaat oqaluuserineqarpoq.
Siunnersuuteqartup sumiiffinni inatsisartunut qinigaasartut amerlassutsimikkut naligiinnerunissaat anguniarpaa. Kuupik Kleist isumaqarpoq inatsisartuni inuit qinigaat ullumikkut nunatta kitaani qeqqaneersuunerusut, tamannalu equngasuusoq.
Kuupik Kleist radioaviisimut oqarpoq naalakkersuisut inatsisartullu aalajangeraat, nunatsinni arlalinnik qinersiveqalissanersoq kommunit tusarniarneqalersut.