Qinersisoqassagaluarpat ingerlaqqiinnassapput
Naalakkersuisuutitaqartut ingerlaqqiinnassagaluarput. Kattusseqatigiit Partiiat inatsisartuni ilaasortaatitaqarunnaassagaluarpoq, tamatumalu kingunerissallugu naalakkersuinikkut sunniutaarunneranik.
Qinersisartunik isumasiuineq HS Analysemit suliarineqarpoq, aviisimi Sermitsiami saqqummersinneqarluni.
Partiit Inatsisartuni ilaasortaatitaqartut, Inuit Ataqatigiit aamma Demokraatit maannakkut 18-inik inatsisartuni ilaasortaatitaqartut allannguuteqassanngikkaluarput, kisiannili Kattusseqatigiit inatsisartunut isertitaqarsimassanngikkaluarlutik.
Kattusseqatigiit Partiiat inatsisartuni ilaasortaatitaqannginnermi, naalakkersuisuutitaqarnermi sunniuteqarsimassanngikkaluarpoq, maannakkut naalakkersuisuutitaqassagaanni 16-inik ilaasortaqarluni amerlanerussuteqarneq qulakkeerneqartarmat.
Qinersisartunut isumasiuinerup inernera Kuupik Kleistip nuannaarutigaa.
- Qujamasunnarpoq, taama oqartariaqarpunga. 2009-mi qinersinerup kingorna politikkikkut sakkortuumik oqallittoqarnikuugaluartoq IA-p suli amerlasuunik tapersersorteqarnera iluarpoq, Kuupik Kleist oqarpoq.
Nunatta Karsiata 2009-mut naatsorsuutai saqqummermata, oqaluttuarisaanermi aatsaat taama annertutigisumik amigartoortoqarpoq.
- Ukioq manna amigartoorfiunngitsumik ingerlatsisoqarnissaa naalakkersuisunit anguniarneqarsimavoq, kiisalu aappagu sinneqartoortoqalaarnissaa anguniarneqassalluni, Kuupik Kleist oqarpoq.
Taassuma nuannarineqanngitsunik aalajangiisarumaarnini qinigaanermini naatsorsuutigereersimavaa.
- Pissutsit taamaanneranut naalakkersuinikkut aalajangersagassat nuannersuinnaanngillat. Aamma tamanna soorunami erserpoq.
- Inatsisartunut qinersisoqareersoq qinersisartut isumasiorneqarmata IA-p nuannarineqarnera annikilligaluarpoq, maannakkulli partiip suut anguniarnerai qinersisartunit paasineqarmat tatigineqaqqilersimanerput malunnarpoq, Kuupik Kleist oqarpoq.
Siumup siulittaasua Aleqa Hammond oqaaseqartinniaraluaratsigu iluatsissimanngilarput.