Qinersisoqartuuppat republikanerit ajorsassagaluarput
USA-mi inatsisartunut ullumi qinersisoqartuugaluarpat republikanerit kinguariangaatsiassagaluarput, demokratillu siuariangaatsiassagaluarlutik.
Aviisi ullormut saqqummersartoq USA Today inunnik isumasiuisitsisimmat paasinarsivoq demokratit 59 procentinit qinerneqassagaluartut, republikanerillu 36 procentinit qinerneqassagaluartut.
Partiit taakku marluk sapaatit akunneri pingasut matuma siornatigut inunnik isumasiuisitsinerni naligiilluinnaraluarput.
1994-imi qinersisoqalermat akerlianik pisoqarpoq, taamanikkut republikanerit siuariarujussuassasut isumasiuisitsinerit takutikkamikkit. Taamaalisoqarporlumi. Repræsentanternes Hus-imi senatimilu republikanerit amerlanerussuteqalerput, ullorlu manna tikillugu amerlanerussuteqartuarlutik.
Pisut assigiinngitsut pissutigalugit republikanerit eqqugaapput.
USA-p Irakimi sakkutui amerlasuut piffissami kingullermi toqutaasimapput, USA-milu naalakkersuisut oqartussallu allat akornanni Irakimik saassussisoqanngitsiartoq aaqqiagiinngissutit saqqummiussorneqarlutik.
Republikanerit Repræsentanternes Hus-imi ilaasortaatitarisimasaata tunuaqqammersup Mark Foley-p nukappiaqqanik atoqateqarnissamik qarasaasiakkut kajumissaarisarsimanera, republikanerinik aamma eqquivoq.
