Qinersisoqartuuppat IA Atassullu siuariaasagaluarput

Qinersisartut isumaannik paasiniaaneq Sermitsiami aqagu saqqummiunneqartussaq upperissagaani Atassut aamma Inuit Ataqatigiit massakkut qinersisoqartuuppat siuariassagaluarput.

Taamaattorli qinersisoqassagaluarpat nikeriarnerit annikitsuinnaassapput Inatsisartunullu ilaasortaatitanik amerleriaateqartussatuaasut tassaapput Inuit Ataqatigiit, tassa ilaasortaatitartik ataaseq qinersinermi kingullermi annaasartik uterteqqissagaluaramikku. Maanna qinersisoqartuuppat IA arfineq-pingasunik ilaasortaatitaqalissagaluarpoq Inatsisartunilu partiini annersatut tullinngoqqissagaluarluni.

Ilaasortaatitaq taanna ataaseq IA-p Siumumit pissarsiarissagaluarpaa, tassa Siumup ilaasortaatitai ataatsimik ikileriassagaluarmata qinersisartuilu 3,6 procentinik ikileriarlutik. Taamaattorli Siumut partiinit annersaaginnarluni qulingiluanik ilaasortaatitaqassagaluarpoq.

Atassut 1,4 procentimik siuariassagaluarpoq, taamaattorli qinersinermi kingullermi ilaasortaatitarilikkatik arfiniliusut pigiinnassagaluarlugit.

Demokraatit aatsaat siullermeerlutik kinguarialaassagaluarput – 0,9 procentimik, taamaattorli qinersinermi kingullermi ilaasortaatitarilikkatik arfineq-marluusut pigiinnassagaluarlugit.

Aamma Kattusseqatigiit Partiiat siuarialaassagaluarpoq.

HS Analysep Sermitsiaq suleqatigalugu nunatsinni qinersisartunik aalajangersimasunik amerlassusilinnik ullumikkut qinersisoqartuuppat kikkunnik qinersissagaluarnerinik apersuinermini paasisai taamaapput.