Qinersisoqalermat meeqqat silammut anisitaapput

Perorsaasut Nunani avannarlerniittut oqalliffiata Ilaqutariinnermut Pisortaqarfik sakkortuumik uparuarpaa, qinersisoqaleriarmat aasit meeqqat paarinerlutat illikartinneqartussanngortut.

Perorsaasut nunani avannarlerniittut oqalliffiata maanna qatsulluinnarpaa, nunatsinni meeqqat paarinerlutat iliuuseqarfigineqarpallaartannginnerat.

- Qatsulluinnarparput, ukiuni arlersuni Kalaallit Nunaanni meeqqat paarinerlutat utikattumik iliuuseqarfigineqanngisaannartumillu oqallisigiuartuarneqarnerat,. Massakkunaasit Kalaallit Nunaanni qinersisoqangajalerpoq, Namminersornerullutillu Oqartussat allaanngilaq meeqqanik paarinerlutanik silammut anisitsiinnartoq, taama sakkortutigisumik Perorsaasut nunani avannarlerniittut oqallittarfiata siulittaasuata tullia Mogens Seider uparuaavoq.

Kalaaliaqqat perlilersut, nakuuserfiusuniittut, imerfigineqartuartullu qinersisoqarnissaa piinnarlugu iliuuseqarfigineqarnissaat kinguartinneqarpoq, oqarpoq.

- Utikattumik ajornartorsiut tamanna oqallisaajuarpoq, ajornartorsiut qanoq pinartigisoq meeqqallu qassit pineqarnersut tusartuarpavut. Kisitsisillu taama sualutsigisut pineqartillugit qangarujussuarlili iliuuseqarfigineqarsimasariaqaraluarput, Mogens Seider oqarpoq.

- Inersimasup qinersisoqalernera paasisinnaavaa, kisianni meeqqap arfinilinnik ukiullip ajornartorsiutinillu aaqqiisinnaanngitsunik ilaqutaqartup qinersisoqalernera paasisimasaqarfigisinnaanngilaa, taakkulu meeqqat ikiorneqarnissartik pisariaqartippaat nassuiaanneqarnissarlu pisariaqartinngilaat, Mogens Seider oqarpoq.

- Suleqatigiissitaq meeqqat paarinerlutat pillugit iliuuseqarfiginissaanut suleqatigiissitaq ingerlaannartussanngorlugu qulakkeerinnereerpugut, Ilaqutariinnermut naalakkersuisoq Tommy Marø oqarpoq.

Taassuma paasisinnaanerarpaa, nunat avannarliit perorsaasui sakkortuumik uparuaammata, naak oqaatsit atorneqartut sakkortuginaraluartut, tassamigooq naalakkersuisut ajornartorsiummut paasinnillutik iliuuseqarniarsarimmata.

- Suleqatigiissitap piaartumik iliuuseqarnissamut suligasuartitap sulisinneqarnera tamatumunnga takussutissaavoq, Tommy Marø oqarpoq.

Mogens Seider erseqqissaavoq nunani avannarlerni allani ajornartorsiut takornartaanngitsoq, tamakkunanili iliuusissanik pilersaarusiortoqartartoq.

Tassunga atatillugu Tommy Marø akivoq, nunatsinni naalakkersuisut ajornartorsiut iliuuseqarfiginiarsarigaat, taamalu iliuusissamut siunnersuut naalakkersuisunngortussat tullinnguuttut atugassaat suliarisimagitsik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat