Qinersisartut pillaanerat Obamap akisussaaffiginerarpaa
Præsident Obama, præsidentip illorsuani, Det Hvide Husimi, ualimut tusagassiortunik katersortitsigami, ajorsarnerminni qinersisartut pillaanerat tamaat akisussaaffiginerarpaa.
- Kissaatigisimasaraluatsitut annerusumik angusaqarsimannginnitsinnut, akisussaaffik tamaat tiguara. Inuit suliffissuarni sulisartut, suliffiini aamma inuit naatsiivimminniittut, sapaatip akunnerini kingullerni nuannaarutigeqisannik naapittarpakka. Taamatut oqaloqatiginnikkaangama tusartakkakka ippassaq qinersinermi uppernarsarneqarput:
- Tassami inuit aningaasarsiornerput pakatsissutigaat aamma meeqqamik ernuttamillu siunissaat ernummatigaat. Sukkanerusumik siuariartornissarput piumasaraat, Obama oqarpoq.
USA-mi inuppassuit suliffissaaleqinerisa iliuuseqarfiginissaat salliutinneqassasoq, Obamap aalajangiusimavaa.
USA-mi Demokratit ippassaq qinersinermi makku annaavaat:
Repræsentanternes Husimi inissat 60-it missaat, taamalu amerlanerussutaarullutik. Aammattaaq Senatimi inissat ikinnerpaamik arfinillit, taamaattorli naalagaaffinni Coloradomi, Washingtonimi Alaskamilu qinersinerit suli kisinneqanngillat.
Aamma guvernøritut atorfiit katillugit arfineq pingasut annaavaat.
