Qinersisartut Lars Løkke narrugaat
Qinersisartut sisamararterutaannaasa ministeriunertut piukkuppaat inuit quliugaangata arfinillit piukkutinngilluinnaraat.
Tamanna misissuinermi Greens Analayseinstitutemit suliarineqartumit ullormut saqqummersartumi Børsenimit noqqaassutigineqarsimasumit saqqummerpoq. Allaat Venstremik Konservativinillu qinersisartunit aningaasaqarnermut ministeri ministeriunertut piukkunneqanngilaq.
Dansk Folkepartiimik Konservativinillu qinersisartut affaasa Lars Løkke ministeriunertut piukkutinngilaat. Namminerlu partiianit inuit quliugaangata sisamaannaat piukkuppaat amerlaqataat piukkussinngitsut.
Ajornartorsiutip qiteraa Lars Løkke naalakkersuinikkut sulilluartutut isigineqanngimmat, taamak isumaqarpoq inuiaqatigiileritooq Johannes Andersen Aalborg Universitetimi atorfilik.
Paasinianerup inernerata ersersippaa Lars løkke Rasmussen-ip sulisinnaassutsiminik uppernassutsiminillu iluarsaaniartariaqartoq. Ilisimaneqarnermini nukappiarapalaatut isigineqarnini allanngortittariaqarpaa. Qinersisartummi nukappiarapalaamik ministeriunerutitaqarnianngillat. Ministeriuneq inussiarnersuusariaqarpoq, kisiannili tatiginartuusariaqarluni Johannes Andersen Børsen-imut oqarpoq.
Lars Løkke Rasmussen piffissami ingerlaqqammersumi uparuartorneqarpoq pisortat akiligaannik nuannaarniartarsimasutut, kisiannili paasiniaanerup ersersinngilaa taakku qinersisartut aalajangernerannut tunngaviusut.
