Qinersisartut amerlanerit qinerseqqeqqusipput

Inatsisartunut 2003-mi qinersereernerup kingorna, Naalakkersuisooqatigiit pingasoriarlutik allangorsimapput, naalakkersuisutullu tunuartariaqalersimasut maanna arlaqalereerlutik. Naalakkersuisut allanngorarnerat pillugu Sisimiuni Nuummilu innuttaasunik isumasiuivugut.

- Isumaqarpunga naalakkersuisoq tulleriiani ukunani sanngiippallaarujussuartoq. Sisimiuni qinersisartoq oqarpoq.

Qinersisartoq alla oqarpoq, aqutsineq taamaattoq kusaginagu, aammalu qinersisitsisoqanngikkaluarluni naalakkersuisooqatigiit aqqutissiuilluartariaqalersut.

Nuummi qinersisartut ilaat isumaqarpoq Naalakkersuisut siulittaasuat Hans Enoksen taarserneqartariaqartoq, Hans Enoksen-igooq siulittaasunngormalli, naalakkersuisut taarserartarneri amerlavallaaqimmata. Qinersisoqarnissaali orniginartinngilaa, nunarput akissaqanngimmat.

Sisimiuni qinersisartut ilaat aalisartuullunilu piniartuusoq isumaqarpoq Rasmus Frederiksen-ip tunuarnera uggornartuusoq, suliassallu ingerlareersut uniiminissaat aalisartup ernumanartoqartippaa.

Nuummi Sisimiunilu qinersisartut arlallit isumaqarput, maannamut aqutsiniarneq naammagiinnarneqarsinnaajunnaarmat qinersisoqartariaqalersoq.