Qinersisartut 40 procentiisa nalorninerat isumasiuinerup ersersikkaa

Inatsisartunut qineqqusaarnerup nalaani qinersisigisartakkat pissarsiarineqarnissaat kisimi aallunneqarneq ajorput, partiinulli sorlernut qinersinissaminnut nalornisut pissarsiarineqarnissaat qineqqusaartut ulapputigisarpaat.

KNR sinnerlugu qinersisartunik isumasiuisitsineq Epinionimit suliarineqartup takutippaa qinersisartut 40 procentingajaat partii sorleq qinissanerlugu nalornissutigaat, qinersinissamut sapaatip akunnerinnanngortorlu.
Isumasiusitsisarfiup Epinionip qinersisartunik misissuisitsinerani qinersisartut 38,5 procentiisa partii sorleq qinissanerlugu nalornissutigivaat. 


Nalornissut amerlanerujussuat qinersineq naammassippat 28 november pissanganartussaassaaq qinersisartunimmi isumasiusitsisarnerit uniuussinnaasarmata. 

Aamma atuaruk IA partiit anginersarilissavaat

Inatsisartunut qinersinermi kingullermi isumasiusitsisarfik HS Analyse aviisi Sermitsiaq sinnerlugu misissuisitsinerani,  IA taamanikkullu naalakkersuisoqatigisai ajugaarujussuartussatut siulittuutigineqarput  16-nik isertitaqartussatut illuatungiliuttullu 15-nik isertitaqartussatut siulittuutigineqarlutik.

Isumasiusitsisarfiup HS Analysep misissuisitsilluni siulittuinera uniuuppoq, Siumut naalakkersuisoqataalu ajugaarujussuarput, soorlu Kuupik Kleist Hans Enoksenimut 2009mi ajugaammat taama pisoqartoq. 
Inatsisartunut qinigassanngortittut maannakkut suliassarilerpaat qinersisartut partiinik sorlernik qinersinissaminnik nalornisut maanna 40 procentiusut pissarsiarinissaat. 

Nunatta katersugaasiviani pisortap Daniel Thorleifsenip   KNR imi ippassaq aallakaatinneqartumi oqarpoq, qineqqusaartut qinersisartut akornanniittarnerat kalaallit nunaanni politikkimi sulinermi aalajangiisuusartoq.   
Illoqarfigisami qinigassanngortitat sumiiffimminni attaveqarluartunik illoqarfinni assigiinngitsuni peqarpoq, tamannalu Siumup ukiuni amerlasuuni  nukittuffigisimavaa, 
sumiiffinni attaveqarluartut nukittuullu soqutigineqarluarput, Daniel Thorleifsen oqarpoq.

Aamma atuaruk Qinersisartut amerlanersaasa aningaasaqarneq pingaarnerpaatikkaat

Daniel Thorleifsen saniatigut Inunnguaq Petrussen politikkikkut ilisimasalittut KNR -imi pulaartorineqarpoq. 
Taanna isumaqarpoq Inuit Ataqatigiit qinersisartunik maannakkut  partiinik sorlernik  qinersinissaminnik nalornisut 40 procentiusunik  pissarsiniassagunik  politikerit kinguaariit nutaat atorluarlugit qineqqusaartariaqartut. 

Epinionip isumasiuinera pillugu paasissutissat

  • Isumasiuineq Nunatsinni innuttaasut 731-t nalaatsornerinnakkut toqqakkat apersorneqarnerinik toqqammaveqarpoq.
  • Paasissutissanik katersuineq piffissami novembarip arfernanit 17-ianut ingerlanneqarpoq. Apersuisut marluinnik oqaaseqartuupput apersorneqartullu kalaallisut danskisulluunniit akissuteqarnissaminnut periarfissinneqarlutik. Apersorneqartut 87 %-ii kalaallisut akissuteqarput 13 %-illu danskisut akillutik.
  • Oqarasuaatit normui atorneqartut TelePostimit pissarsiarineqarput, tassaallutillu oqarasuaatit nalinginnaasut, angallattakkat aammalu Tusassillit normui.
  • Kisitsisitigut paasissutissat nangaanartoqassusiat  annerpaamik +/- 3,6 procentiuvoq.

 

IA-mi siuttoq ataaseq pineqanngitsoq taanna oqarpoq tamannalu ajunngequteqartoq  isumaqarluni.
Partii pingasunik siuttoqartoq oqartoqarsinnaavoq tassalu Aqqaluaq B. Egede, Sara Olsvig aamma Juliane Henningsen  taakkulu pingasuullutik nutaajupput aamma nutaaliorniartuupput  taannalu atorluarniartariaqarpaat, Inunnguaq Petrussen taama oqarpoq.

Qinersisartut partiimik sorlermik qinersinissaminnik nalornisut isumasiusitsisarfimmit Epionemit sianeqattaarfigineqarlutik aperineqarput, partii sorleq qinerususinnaanerat. 

21 procentit IA qinersinnaallugut oqarput,  14 procentillu Siumut qinersinnaallugu akissuteqarlutik. 

 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl