Qinersisartunik ataatsimiisitsinerit tulleriinneri aajuku
Kattusseqatigiit Partiiat marsip aappaani siulliussaaq. Partiip anguniagai KNR-TV-kkut radiokkullu ulloq taanna saqqummiunneqassapput kingornatigullu apeqqarissaartoqassalluni. Apeqqarissaarnerup kinguninngua radiokkut aallakaatitsinermi qinersisartut apeqquteqarnissaminnut aamma periarfissaqassapput.
Partiip ilisarititsissutitut aallakaatitassaasa tulleriinnissaat makitsissutigineqarmata tamanna qularnarunnaarput.
Aajuna tulleriinnissaat:
2. marts Kattusseqatigiit Partiiat
3. marts Partii Inuit
4. marts Siumut
5. marts Atassut
6. marts Demokraatit
7. marts Inuit Ataqatigiit
Qinersisartunik ataatsimiisitsinerit toqqaannartumik aallakaatinnissaannut ullut aamma aalajangersarneqarput. Qinersisartunik ataatsimiisitsinerit siullersaat Ilulissani februaarip aqqaneq-aappaani ingerlanneqassaaq. Aappassaat Sisimiuni februaarip 14-iani pissaaq. Qaqortumi februaarip 20-iani, Nuummilu marsip qulingiluaani toqqaannartumik qinersisartunik ataatsimiisitsisoqassaaq.
Qinersisartut isumaannik misissuinerit takutippaat Naalakkersuisut siulittaasussaat Aleqa Hammondiunngikkuni, Siumut, Kuupik V. Kleistiussasoq, Inuit Ataqatigiit.
Partiit siuttui taakku marluk apeqqarissaarfigineqarnerat toqqaannartumik aallakaatinneqassaaq. Ilisimatusarfimmi ilinniartut Ilisimatusarfimmi apeqqarissaartitsinissamik aaqqissueqataarusullutik siunnersuuteqarsimapput. Apeqqarissaarneq februaarip 26-iani pissaaq.
