Qinersisarnermut Ataatsimiititaliaq isummissaaq
Sisimiuni kommunalbestyrelsemut qinigaasinnaananilu qinigassanngortissinnaanngitsup Siumumeersup Malik Berthelsenip taasisuisa 215-it partiimut tunuliaqutaanut tunniunneqarnerat pillugu Siumumut illuatungiliuttut qinersinerup kingorna naammagittaalliutaat, Sisimiut Kommuneanni qinersinermik siulersuisut itigartippaat.
Sisimiut kommuneani qinersinermik siulersuisut itigartitsinermikkut taamaalillutik Namminersornerullutik Oqartussani Qinersinermut Ataatsimiititaliap ullormi qinersivimmi aalajangernera malippaat.
Sisimiuni qinersinermik siulersuisuni partii Siumut amerlanerussuteqarluni aalajangerpoq, Malik Berthelsenip taasisai partiimut tunuliaqutaanut tunniunneqassasut. Partiilli illua´tungiliuttut eqqarsaatigalugit Namminersornerullutik Oqartussanut ingerlatitseqqiisoqartoq, tamannalu Namminersornerullutik Oqartussani qinersinermut Ataatsimiititaliamit apriilip 27-ani isummerfigineqassasoq borgmester Hermann Berthelsen ilisimatitsivoq.
Sisimiuni qinersinermik siulersuisuni Siumut amerlanerussuteqarpoq, amerlanerussuteqartullu aalajangernerat Demokraatit naammaginngilluinnarpaat.
- Akuerineqarsinnaanngilaq, inatsisinimmi unioqqutitsisoqarsimanera Inuit Ataqatigiit, Atassut Demokraatillu ataatsimoorluta naammagittaalliutitsinni erseqqissumik nassuiaateqarfigisimavarput. Taamaattumik aalajangerneq qinersinermi peqquserlunnertut taasariaqarpoq, Palle Christiansen oqarpoq.
Palle Christiansenip neriuutiginerarpaa, Namminersornerullutik Oqartussani Qinersinermut Ataatsimiititaliaq suliassanngortitamik misissuinerminni inatsisilerituunik ikiorteqarumaartut.
Malik Berthelsen-ip qinersisinnaananilu qinigaasinnaajunnaartitaanini ullormi qinersivimmi aatsaat paasisani, Sisimiuni qinersinermik siulersuisunut aamma suliassanngortitsissutigaa, naammagittaalliuullu siulersuisut amerlanerussuteqartut akuersaarlugu, Namminersornerullutik Oqartussani Qinersinermut Ataatsimiititaliap qinigaasinnaajunnaarsitsisimanerata allanngorteriarneqarnissaanik suliassanngortitsipput.