Qinersinissap tungaanut naalakkersuisoqarneq

Inatsisartut aggersarneqarlutik ataatsimiilernissaasa tungaannut maanna naalakkersuisuusut ilungersunartunik namminneq aalajangiisassanngillat ulluinnarnili nalinginnaq suliassat isumagiinnassavaat; naalakkersuisut siulittaasuat Hans Enoksen

oqarpoq naalakkersuisortaarnissap tungaanut politikikkut aalajangigassat pinartut partiit siuttui attaveqarfigalugit aalajangersaasoqarsinnaasoq. Aningaasanullu inatsisissaq sumut killippa?

Hans Enoksen oqarpoq inatsisartut katersuuppata siunnersuutiginiarlugu aningaasanut inatsissatut maanna suliarineqartoq qinersinerup kingorna qaammatini siullerni pingasuni atuukkallartussatut akuerineqassasoq.

Aamma Arctic Umiaq Linep siunissaa inatsisartunut ilaasortanngortut aalajangiiffigisassaasa pingaarnerpaat ilagaat Hans Enoksenillu neriuutigaa AUL pillugu maanna isumaqatigiinniarnerit ingerlalluartut partiit siuttuisa isumaqataaffigiumnaaraat. Inatsisartut siulittaasuat, Jonathan Motzfeldt ulloqeqqata siorna oqarpoq Inatsisartut siulittaasoqarfiata inuttai aqqanernut ataatsimiigiaqqusimallugit inatsisartut qaqugu ataatsimiilernissaat aalajangerniassallugu.