Qinersinissamut pilersaarutit partiit suli naammassinngilaat

Sapaatip-akunnera sinnerpaa Naalakkersuisut siulittaasuata Hans Enoksenip qinersisoqarnissaa nalunaarutigimmaguli.

Tassa taava imaappoq, partiit tamarmik sapaatip-akunnera sinnerlugu qinersinissamut pilersaarusiornissamut piffissaqaraluarput.

Partiilli tamarmik suli piareersimanngillat.

Siumukkut qinersinissamut pilersaarusiartik naammassipajaareernerarpaat, sulili nutserneqarsimanngimmat tamanut saqqummiunnianngikkallarpaat. Taama partiip allattaa, Johannes Mathiassen ilimatitsivoq.

Inuit ataqatigiit qinersinissamut pilersaarusiartik pillugu ualimut oqaaseqarnissartik naatsorsuutigigaat, Avva Mathiassenip oqaatigaa.

Illua´tungiliuttulli aamma sapaatip-akunnera sinnereeraluaraa suli naammassisaqarsimanngivipput.

Demokraatit aallarniutertik danskisuinnaq allassimasartik illoqarfinni ullup ingerlanerani agguaatissamaarnerarpaat.

- Immikkoortortaqarfiit qisuariaateqassappata, kalaallisut aatsaat nutsertissavarput, partiip siulittaasua Per Berthelsen oqarpoq. Taassuma naatsorsuutigaa, qinersinissamut pilersaarut tamanut saqqummiunneqarsinnaalissasoq sapaatip-akunnerata tulliani pingasunngorpat sisamanngorpalluunniit.

Atassutip sapaatip-akunnera qaangiuppat aatsaat ilimagaa naammassisaqarnissani. Allamik suliaqarsimanerput kinguarsaatigisimavarput, Atassutip siulittaasua Finn Karlsen oqarpoq.

Kattusseqatigiinniit Anthon Frederiksen oqarpoq, pilersaarusiartik suli naammassineqanngitsoq, aatsaallu ulluni qaninnerni naammassinissaa ilimagineqarsinnaasoq.

Ilanngutassiap naammassereernerata kingorna Josef Motzfeldt oqaloqatigaarput, taanna oqarpoq pilersaarusiartik ullo´qeqqanut tamanut saqqummiunneqassasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat