Qinersinerup inernerata ersarissup Siumut partiini anginersanngortippaa
Siumut taamaalilluni naalakkersuisooqatigiinnik nutaanik pilersiniarnermi isumaqatigiinniarnerni aquttussanngorpoq. Atassut, Partii Inuit Demokraatilluunniit naalakkersuisooqatigisinnaavai, aamma IA-p naalakkersuisooqatigineratigut naalakkersuisooqatigiinnik atituunik pilersitsisinnaapput.
Demokraatiniunissaalli ilimanngilaq, Jens B. Frederiksenimmi Siumut naalakkersuisooqatigiinni suleqatiginiarnagu qanittukkut nalunaarutigereerpaa. Atassut ukiuni kingullerni illuatungiuliuttoqatigalugu suleqatigilluarsimaneranut akilerneqassanersoq suli nalornarpoq. Kiisalu aamma Nikku Olsen Randi Brobergillu immaqa Naalakkersuisutut politikkikkut suliaqalernitsik aallarteratarsinnaavaat.
Naalakkersuisunngortitsinissaq pillugu knr.gl-imi ulluni tullerni sammisaqarnissarput qularnanngilaq.
