Qinersinerup inernera Atassummut pingaaruteqarpoq

Qinersinerup inernera Steen Lyngep Atassummi siulittaasussarsiornissami atoriaannaavaa.
Allattoq Per Andersen
septembarip 15-at 2011 21:07

Qinersinerup inernera Atassutip arfininngorpat nalilersussavaa. Maanna qinersinermi Folketingimut qinigaatitaqanngillat taamaattorli qinersinerup inernera partiip iluani sunniuteqarataannaavoq.

- Siullermik qinersinerup inernera tamaat takoqqaariartigu. Kisianni qineqqusaaqatinnut sanilliullunga taaguunneqarluassaguma ataatsimeersuarnermi siulittaasumut sassarnissata eqqarsaatigisinnaalluarpara, Steen Lynge KNR.gl-mut oqarpoq.

Atassut arfininngorpat ataatsimeersuassaaq Nuummilu Atassutip immikkoortoqarfiata Steen Lynge kajumissaarpaa siulittaasussarsiornissami sassaqullugu,  maannalu siulittaasuusoq Gerhardt Petersen aamma sassarniarpoq.

Atassut sinnerlugu Folketingimut ilaasortaasarsimapput Otto Steenholdt aamma Ellen Christoffersen. Maannali tassa qinersinerit pingasut tulleriit Atassut Folketingimut qinigaatitaqanngilaq.

- Atassutip maanna tikissimavaa nutarternissaq tamannalu piffissami sivisuumi pisinnaavoq. Kisianni tassa siulittaasunngortussap suliassaa annertooq tassaavoq partiip siunissaata ilusilersornissaa, Steen Lynge taama oqarpoq.