Qinersinermut tunngatillugu piumasaqaatit

Kuupik Kleistip Jens B. Frederiksen aamma Anthon Frederiksen peqatigalugit qinersinissamik suaaruteqarmat, inuiaqatigiinni piumasaqaatit naammassiniagassat assigiinngitsorpassuit naammassineqartussanngorput.
februaarip 01-at 2013 06:13

Partiit qinigassanngortitsisinnaasut februaarip ulluisa 19-iat nallertinnagu qinigassanngortitamik allattorsimaffii tunniutereersimassavaat, tassanilu partii sinnerlugu qinigassanngortittut allattorneqarsimassapput. Partiit qinigassanngortitassaminnik suli toqqaasimanngikkunik, ulloq killiliussaq nallertinnagu partiip immikkoortortaqarfiinit innersuussisoqarnissaa piaartumik isumagisariaqassavaat.

Partiit suli qinigassanngortitsisinnaanngitsut, februaarip 19-iata tungaanut atsiornernik 919-inik katersissapput akueritillugillu. Inatsisartuni ilaasortaatitaqalernissamut taasinerit taama amerlatigisut pisariaqartinneqarput, taamaammat aamma partii qinigassanngortitsisinnaatitaassuguni atsiornerit taama amerlatigisut pisariaqartippai. Partiit Inatsisartuni ullumikkut ilaasortaatitaqartut atsiornernik tunniussisariaqanngillat.

Qinersineq suaarutigineqarniartorlu, allakkatigut qinersisoqarsinnaanngorpoq. Qinersisartut inunnik nalunaarsuisarfimmi allakkatigut qinersisinnaapput. Qinersisartup kommunimut qinersinermi nalunaarsorneqarfigisaani qinersisoqassaaq. Nunaqarfinni asimioqarfinnilu inunnik nalunaarsuisarfiup ikiortaanut allakkatigut qinersisoqarsinnaavoq.

Napparsimmavinni, katsorsaavinni paaqqinnittarfinnilu kiisalu sullissivinni pinerluttunik isumaginnittoqarfiup ataaniittuni aamma allakkatigut qinersisoqarsinnaavoq. Qinersisartut avinngarusimasumi najugaqartut Qinersinermi siulersuisut toqqagaanut allakkatigut qinersisinnaapput.

Qinersisartut umiarsuarnut Kalaallit Nunaanneersunut ilaasut, umiarsuup naalagaanut imaluunniit taassuma toqqagaanut qinersisinnaapput. Silasiorfinni, mittarfeqarfinni allanilu Qinersinermi siulersuisunit piginnaatinneqartumut allakkatigut qinersisoqarsinnaavoq.

Qinersisartut Danmarkimiittut Savalimmiuniittulluunniit inunnik nalunaarsuisarfimmi imaluunniit Københavnimi nunatta aallartitaqarfiani qinersisinnaapput. Qinersisartut naalagaaffiup avataaniittut, danskit naalagaaffiata allanut attaveqartitsisuini imaluunniit konsuleqarfiini qinersisinnaapput.

Allakkat qinersissutaasut kommunimut qinersisartup qinersinermi nalunaarsorneqarfigisaanut nassiunneqassapput. Allakkatigut qinersissutaasut qinersisartup qinersinermi nalunaarsorneqarfigisaanit qinersinerup naammassineqannginnerani, tassalu marsip 12-iani nal. 20.00 nallertinnagu, tiguneqareersimassapput. Taamaammat piffissaagallartillugu allakkatigut qinersinissaq kaammattuutigineqarpoq.