Qinersinermut inatsisip misissorneqarnissaa sulissutigineqalerpoq

Inuusuttut nunarput qimallugu ilinniariarsimallutik angerlaqqikkaangamik qaammatit siulliit arfinillit nunatsinni qinersinernut mattunneqartarnerat allanngorteqqullugu Siumut Inuusuttunut Suliniaqatigiiffiata siunnersuutaa, Inatsisartut kulturimut ataatsimiititaliaani ilaasortat arlallit taperserpaat.

- Inuk kinaluunnit inuunini naallugu nunatsinni najugaqarsimasoq kalaallit politikkianni qinigassanngortissinnaallunilu qinersisinnaatitaasariaqarpoq, taamaattumik nunani allani ilinniartunut tunngatillugu immikkut aaqqissuussisoqartariaqarpoq. Kulturimut Ataatsimiititaliami siulittaasoq Siumumeersoq Doris Jakobsen tunngavilersuivoq.

Doris Jakobsenip oqaluuserisaa tassaavoq, Sisimiuni qinersisinnaananilu qineqqusaarsinnaanngitsup Malik Berthelsenip Siumut sinnerlugu kommunalbestyrelsemut qinigassanngortissimanera, Danmarkimut qaammatini marlunni pikkorissariartorsimanini pissutigalugu qaammatit arfinillit nunatsinniittussaatitaanermut piumasaqaammik naammassinnissimanngitsoq. Doris Jakobsen aamma isumaqarpoq, ilinniartunut siunnersuinerup pitsaanerulernissaa sulissutigissallugu pisariaqartoq kiisalu Inatsisartut ukiamut ataatsimiinnissaanut siunnersuuteqarnissaminik pilersaaruteqarluni, siunissami ilinniariartortussat pikkorissariartortartussallu eqqarsaatigalugit.

Inuit Ataqatigiinneersoq Georg Olsen aamma isumaqarpoq, inatsisit misissoqqinneqartariaqaraluartut.

- Qinersisinnaanermut inatsimmik erseqqinnerusumik peqartariaqarpugut, taamaattumik sivikitsuinnarmik angalasartut nuuttarnerat naleqqunnerusumik aaqqissuuttariaqarparput. Georg Olsen oqarpoq.

Kulturimulli Ataatsimiititaliami ilaasortat inatsisinik allanngortitsiniarnissamut tamarmik isumaqataanngillat, Demokraatinit Astrid Fleischer Rex ima tunngavilersuivoq:

- Nutartertariaqarnersoq naluara. Inuup nammineq aalajangertussaavaa, ilinniariaraanni adresse allanngortissanerlugu. Allanngorterusukkaannilu ilisimasariaqarpoq, suut iluaqutaassappat suullu ajoqutaassappat. Malik Berthelsenimut tunngatillugu amigaataasimagunarpoq, suut ajoqutaasinnaanersut. Astrid Fleischer Rex oqarpoq.

Atassut sinnerlugu kulturimut ataatsimiititaliami ilaasortaq Ellen Christoffersen aamma Ilinniartitaanermut naalakkersuisoq Inuit Ataqatigiinneersoq Henriette Rasmussen oqaaseqartinniaraluaratsigit iluatsinngilarput.