Qinersinermi taasinernik kisitseqqissaarnerup kingorna makitsisoqartariaqartoq
Qinersinermut ataatsimiititaliap siulittaasuata, Svend Hardenbergip, oqaatigaa kisitseqqissaarnerup kingorna sisamariarluni makitsoqartariaqartoq paasineqarsimasoq.
Partiilli ilaasortaatitariligaasa agguataarneqarnerinut sunniuteqassanngilaq, kikkulli makitsissutigineqassanersut Svend Hardenbergip oqaatigiumanngilaa, oqaatigaluguli makitsinerni pingasuni qinigassanngortittut sinniisuutitat allattorsimaffianni inissisimanerannut attuumassuteqartut.
Inatsisartuni inissaq makitsissutigineqassaaq
Makitsinermili ataatsimi kiap Inatsisartunut ilaasortanngornissaa makitsussutigineqassaaq, makitaanngitsoortorlu siullertut sinniisussanngortinneqassalluni, Svend Hardenberg KNR-imut taama oqarpoq.
AAMMA ATUARUK Inatsisartunut ilaasortanngortut aajuku
Qinersinermi kisitsisit radioaviisimit qimerluualaaratsigit paasivarput Jess Svane Siumumeersoq, kisitseqqaarnermi Inatsisartunut qinigaasoq, Suka M. Frederiksenimit ataatsimik amerlanerussuteqartoq. Siumulli sinnerlugu qinigassanngortittut taakku marluk pineqarnersut pisortatigoortumik uppernarsartissinnaasimanngilarput.
Makitsineq Namminersorlutik Oqartussat tusagassiortunik katersortitsisarfiani ualeru nalunaaqutaq marluk pissaaq.