Qinersinermi peqqusersusaarneq annertusimavoq

Qinersinerup inernera ippassaq saqqummiunneqartussaagaluarpoq piffissarli kingullerpaaq unitsinneqarluni.

Qineqqusaartorpassuit qinersinerup inernerata nalunaarutigineqarnissaanut utaqqikatattut qinersinermik aqutsisut tativaat. Kinguartitsinerlu suli peqqusersusaarnerunermik kinguneqaannarnissaa ernummatigineqarpoq.

Qinersinermik suliaqartut septembarip 18-ianni qinersisoqareersorlu kisitsillutik aallartilermata torersumik qinersisoqarsimanissaa kikkut tamarmik naatsorsuutigigaluarpaat. Taamaanngiarli. Naammattunnguamik peqqusersusaartoqarsimavoq.

Qinersiviit immersoriikkat qinersisoqannginneranili qinersivinnut ikiorarneqarsimapput. Qinersisartut qineqqusaartunik aalajangersimasunik pinngitsaalineqarlutik qinersisinneqarsimapput. Qinersiviit pisiarineqartarsimapput tunineqartarsimallutillu qinersinermillu aqutsisut peqqusersusaarsimallutik il.il.

Millionillit missaanniittut qinersinerat atorsinnaanngitsut qinersinermik nakkutilliisut marluk aviisersuarmut New York Timesimut oqarput.

Qinersinermik ataatsimiititaliap peqqissaarussinini unneqqarissumillu iliornini pillugu nersualaarneqarpoq. Ataatsimiititalialli qinersinerup inernerata kinguartinnissaa ippassaq aalajangermagu inuit pasitsalerput.

- Susoqartoruna, aperipput.

Qineqqusaartut 2.500-sut inatsisartuni inissat 246-sut paggataat pillugit ataatsimiititaliaq utaqqitsitsiinnassanerpa?

Ataatsimiititaliap siulittaasua Fazil Manawi oqaluttuarpoq septembarip 18-ianili qinersisoqarmat qineqqusaartut hundredelikkuutaarlutik allaffimmi illumilu eqqaanni tammaalersimasut imminnullu iluaqutsissanngorlugu kukkoqqullugu akilerniartarsimallugu. Maannamulli taamaaliorumasarsimanngilaq.

- Manawi malartitassaanngitsoq nalunngilarput, ilisarisimannittut ilaat New York Timesimut oqarpoq nangillunilu:

- Taamaakkaluartorli naaggaartortuaannarsinnaanngilaq.