Qinersinermi peqquserluttoqarsimaneranik pasilliinerit sakkortuseriaqqipput

Qinersinernut Europami nakkutilliisut naalagaata oqarnera naapertorlugu, qinersinerit 1 millionit, maanna præsidentiusumut Hamid Karzaiimut, kisitsinerit naapertorlugit siuttuusumut, iluaqutaapput. Hamid Karzaiip, unammillertaatalu Abdullah Abdullah-p, qinersisaasa amerlassusaat sapaatip akunnerata ataatsip matuma siorna kingullermik kisitseqqittoqarmalli suli allanngunngillat.

Afghanistanimi aggustip 20-anni præsidentimut qinersinermut atatillugu peqquserluttoqarsimaneranik naammagittaalliuutit imaaginnavipput. Qinersisitsisut, Karzaiimik tapersersuisut naammagittaalliuutigineqarnerpaapput, taakkumi pappilissat qinersiviit peqquserlullutik allanngortiterlugit qinersivimmi boksinut ikiorarsimammatigik, tassa Karzaiip aqqata nalaa krydsilertarlugu.

Peqquserluttoqarneranik oqalunnerit ingatsikkaluttuinnarnerat qinersinermi nakkutilliisunut nunanit tamalaanneersunut nuanniitsorujussuuvoq, Afghanistanimimi præsidentimut qinersineq taakkua nersualaarpaat, qinersinerup pikitsitsinianit Talibaninit suujunnaarsinniarneqarnera iluatsinngitsoormat.

Taamaakkaluartoq Hamid Karzaiip præsidentitut ingerlaqqinnissaa ilimanarsigaluttuinnarpoq. Afghanistanimi qinersinermut ataatsimiititaliap kikkunnulluunniit attuumassuteqanngitsup, aggustip 20-anni qinersinerup inernera pisortatigoortumik ullumi saqqummiuppaa. Tassani oqaatigineqarpoq, Karzai 54,6 procentinik qinigaasimasoq, unammillertaalu Abdullah Abdullah 27,8 procentinit qinerneqarsimasoq.