Qinersinermi naliliisartoq: Hans Enoksen aalajangiisariaqarpoq

- Siumup siulittaasuata inuit pineqartut tunuaqqusinnaagaluarpai, qinersinermi naliliisartoq Daniel Thorleifsen oqarpoq.

Tassa Siumut massakkut ilungersuatinneqarpoq. Politikerit nuimasut aningaasanik ilassinnissutinik atornerluisarsimasutut tusagassiuutitigut saqqummiunneqaqattaarput. Qinigassanngortittut Siumup siulersuisuunerinit akuerineqaqqaartarput, uanilu aalajangerneq ilaasortanit isumaqatigineqanngitsoq, Daniel Thorleifsenip nalillerpaa.

- Siulersuisuunerit aalajangernerat qineqqusaartunit massakkut isumaqatigineqanngitsoq paasinarpoq, Daniel Thorleifsen oqarpoq.

Kujataani Siumut sinnerlugu qinigassanngortittut partiimi ilaasortaqatitik ilassinnissutinik atornerluisimasutut isornartorsiorneqartut tunuaqqullugit kaammattuipput.

Jonathan Motzfeldt uani pineqarpa?

- Tassa tusagassiuutinut nalunaarummi taamatut isikkoqarpoq, Daniel Thorleifsen oqarpoq.

Sooruna Siumut sinnerlugu qineqqusaartut taamatut oqariartuuteqartut?

- Ilassinnissutinik atornerluisimanerangaasut pissutaallutik Siumut kinguariarsinnaammat, tamannalu annilaangassutigineqarpoq, Daniel Thorleifsen oqarpoq.

- Qineqqusaartut Siumumi siulersuisuunerit naapeqatigalugit iluminni ajornartorsiutit eqqartortuassagaluarpaat. Kisianni aamma ima ilungersuanarsitigisinnaavoq allaat siulittaasoq nammineerluni tunuaqqusinissamik aalajangiisariaqalerluni, Daniel Thorleifsen qinersinermi naliliisartoq oqarpoq.