Qinersinermi krydsiliisoqarani qinersisoqarpoq
Kalaallit Folketingimi Christiansborgimi aallartitassatut qinigassaat pappiaqqami taasivissami krydsiinnaanngitsumik, atii kinguliaalu allallugit qinersisoqarpoq. Taavami qinigassanngortittup aqqa kukkullugu allakkaanni atequsialuunniit allakkaanni qanoq pisoqassava?
Danmarkimi pappiaqqami taasivissami qinigassanngortittup aqqata nalaatigut krydsiliisoqartarpoq. Maani pappiara allanneqanngitsoq tunniunneqartarpoq tassanilu qinigassanngortittoq sorleq imaluunniit partii sorleq qinerusunnerlugu allattoqarsinnaalluni.
Isumalioqqajaanarpoq periaaseq maani pappiaqqat taasiviit atuarneqarsinnaanngitsut kukkusumilluunniit allanneqartut qinersinernut maangaannartunut amerlanerusunut pissutaasarnersut. Taamaattoqanngilarli, Kalaallit Nunaanni qinersinermut qullersaq, Rigsombudsmand Søren Hald Møller uppernarsaavoq.
- Tamanna pissuteqarpoq qinersineq pillugu inatsimmi aalajangersarneqarsimammat qinersineq atorsinnaasuussasoq qinersisartup kina qinersimaneraa qularutigineqanngippat. Qularutissaanavianngilaq assersuutigalugu soorlu Ellen Christoffersenip naggataa ff-imik allannagu ph-lerlugu allanneqarsimappat imaluunniit Lars-Emil Johansenip aqqa kittoraasernagu allanneqaraluarpat, Søren Hald Møller oqarpoq.
Taavami qinersisartup pappiaqqami taasivissami Tuusi allappagu Josef Motzfeldtimut taarsiullugu?
- Taamatut pisoqarpat pappiara taasivissaq aamma imaaliallaannaq atortussaajunnaarsinneqarsinnaanngilaq. Tamatumani aammattaaq naliliisoqaqqissaaq qinersisartup kina eqqarsaatigineraa qularutigineqarnersoq, tassa takussallugu allat atequseq atorsimaneraat. Qinersisarneq pillugu inatsimmi siumut eqqarsaatigineqareerpoq maani aqqit naalagaaffeqatigiinnerup sinneraninngarnit allaanerusumik atorneqartarmata, Søren Hald Møller oqarpoq.
Siullermik najukkani assigiinngitsuni qinersisarnermut siulersuisut tassaapput pappiaqqat taasiviit atorsinnaanerannik aalajangiisuusussat. Naggataatigut Rigsombudsmandi tassaavoq kisitseqqissaarnermut akisussaasoq aalajangiisuusussamillu naliliisussaasoq.
Qinigassanngortittut pappiaqqanut taasivissanut tunuartinneqartunut naammagittaalliuuteqarnissaminnut periarfissaqarput, periarfissarli tamanna Folketingimut qinersisoqartillugu qaqutiguinnaq atorneqartarluni. Maani qinigassanngortittut imminnut ungaseqaat, pappiaqqallu taasivissat atorsinnaanngitsut qinersinerup qanoq inerneqarnissaanut qaqutiguinnaq allannguutaasinnaallutik.
Kommunini qinersinerni Namminersornerullutik Oqartussat qullersatut inissisimaffianni pappiaqqat taasiviit atorsinnaanngitsut suli ataasiarlugit naliliivigineqaqqittarnerat nalinginnaaneruvoq. Tassa tamatumani taasinerit ikittuinnannguit isertitsisoqarnissaanut isertitsisoqannginnissaanulluunniit aalajangiisuusarmata.
Nunatsinni taasiviit qinigassanngortittut aqqinik allanneqanngitsut toqqarneqarsimammata tamanna pitsaaquteqarpoq. Qinigassanngortinnissamut killiliussaq novembarip aappaanni qaangiuppoq, pappiaqqallu taasiviit qinersinissami nunaqarfimmut isorlerpaamut anngutitinniarnissaat ajornakusoorsinnaalluni. Qinersinermi aamma ikiortissarsiortoqarsinnaavoq, soorlu innarluuteqarneq pissutigalugu kina qinissanerlugu allannissaq ajornartorsiutaappat.
