Qinersineq puigorneqaqqajaasartoq aamma pingaaruteqarpoq
Ukiut 50-it matuma siorna inuit ilagiinnut atanerat ullumikkut annikilliartuinnarpoq. Peqatigisaanik aamma naalagiartartut ikiliartuinnarput. Taamaattorli ilagiit assigiinngitsut ilaanni tamat oqartussaaqataanerat ingerlalluarpoq.
Sumiiffiit ilaanni qinigassanngortitassanik amigaateqarneq pissutigalugu qinigassanngortinnissamut piffissaliussaaq sivitsorneqarpoq, allanilu taasisoqartinnagu qinersisoqarluni, tassa qinigassanngortittut pisariaqartinneqartut tamanit isumaqataaffigineqarlutik toqqarneqarlutik. Kiisalu aamma ilagiit ilaqarput ilagiit sinniisaannut ilaasortaanissamut ima soqutigineqartigisut qinersisoqartariaqarluni. Taakkununnga ilaavoq Nuuk, qinersisartulli ullaarnganit qinersiviliarnerannik kiguneqarsimanngilaq.
Qinersineq eqqissisimasumik ingerlavoq, qinersiffissamik tunineqarnissap tungaanut oqaloqateqalaarnissamut piffissaqartitsilluni. Ilagiit sinniisaannut qinersinerit assigiinngitsut inerneri aqagu ullup ingerlanerani saqqummiunneqarnissaat naatsorsuutigineqarpoq, qinersinerlu knr.gl-imit malittarissavarput.
