Qinersineq malinnaavigineqarpallaanngitsoq

Nunaqarfinni aqutsisunut ullumikkut qinersisoqarpoq, qinersinerli pillugu pisortat partiillu paasissutissaataat annikitsuinnaapput.

Nunaqarfinnut qinersinerup kommunalbestyrelsenut qinersinernut qanippallaamik inissinneqartarnera soqutiginikinnerusarneranut patsisaaqataagunartoq, nunaqarfiit peqatigiiffianni siulittaasoq Karl Tobiassen naliliivoq.

- Qinigassanngortittartorpassuaqartarpoq, nunaqarfimmiut soqutiginnilluartarnerat matumani takuneqarsinnaavoq. Qinigassanngortittulli partiillu avammut annertunerusumik paasissutissiineq ajorput, suna peqqutaasimanerpoq. Karl Tobiassen oqarpoq.

Atassut sinnerlugu sineriak tamakkerlugu qinigassanngortittut katillugit 66-iupput, Demokraatit Qeqertarsuatsiaani Kangerlussuarmilu katillugit arfneq-marlunnik qinigassanngortitaqarput.

Partiilli Siumut Inuit Ataqatigiillu nunaqarfinnut aqutsisunut qinigassanngortitatik qanoq amerlatiginersut paasissutissaatiginngilaat.

Kattusseqatigiinnut paasiniaagaluaratta iluatsitsinngilavut.

Kommunit internetikkut nittartagaanni nunaqarfinnut aqutsisunut qinersineq pillugu aamma allassimasoqanngilaq, kommune ataaseq, tassalu Maniitsoq eqqaassanngikkaanni.

Namminersornerullutik Oqartussani qinersinermut akisussaasut paasiniaavigigaluaratsigik, ataatsimiimmata iluatsitsinngilavut. Ilaatigut apeqqutigerusussimagaluarparput, qinigassanngortittut qasserpiaanersut qinersinerullu inerneri sumi takuneqarsinnaassanersut.

Nunaqarfiit saqqumilaarnerulernissaat anguniarlugu peqatigiiffik qanoq iliuuseqarsinnaava ?

Tamanna pillugu nunaqarfiit peqatigiiffianni siulittaasoq Karl Tobiassen ima akissuteqarpoq:

- Nunaqarfinni ataasiakkaani qinigassanngortartut aamma nipitunerusinnaagaluarput, tullissaanulli uagut, soorlu qinigassanngortittut qassiunersut paasissutissanik siammarterisarnissaq suliniutigisariaqassavarput avataanit malinnaasoqarsinnaanera eqqarsaatigalugu. Karl Tobiassen erseqqissaavoq.

Nunaqarfinni aqutsisunut qinersineq pillugu Kommuneqarfiit Kattuffiannut paasiniaagaluaratta aamma iluatsitsinngilavut. Qinersinermi kingullermi 2001-mi nunaqarfinni arfineq-marlunni unammillertoqanngimmat taasisoqanngilaq.

Siumut partiinit annerpaalluni ajugaavoq 2.000-nit taaneqarsimalluni, Inuit Ataqatigiit Atassullu amerlaqatigiiginnangallutik tamarmik immikkut 700-init taaneqarsimapput. Kisimiillutik qinigassanngortittut Kattusseqatigiillu tamarmik immikkut 300-nik taaneqarsimapput.

2001-mi taasisinnaasut 65 %-iisa missaanniittut taasiartorsimapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat