Qinersineq: Kina Frankrigimi præsidentinngussava?

Macron præsidentitut ingerlaqqinnissani siusinnerusukkut qulakkeeqqagaluarpaa, Marine Le Penili qinersisartunit taperserserterpassuaqalerpoq.
Emmanuel Macron Frankrigimi præsidentiuinnassanersoq unammillertaata Marine Le Penip qularnarsisippaa. Qinersisartut isumaannik misissuinerup tamanna ersersippaa. Assi © : Jeremias Gonzalez/AP/Ritzau Scanpix
Allattoq Ritzau
apriilip 10-at 2022 12:49

Frankrigimi præsidentimut qinersineq siulleq ullumi pissaaq. Qineqqusaartut aqqaneq-marluk akornini præsidentissap tullia nassaarineqassaaq.

Frankrigip maanna præsidentia Macron qinigaaqqissasoq qinersisartut isumaannik misissuinerup sapaatit akunnialuit matuma siorna takutippaa. Maannali taassuma unammillertaa Marine Le Pen præsidentip qinigaaqqinnissaanut aarlerinartorsiortitsivoq.

Macronip Ukrainimut tapersersuinera aningaasaqarnerullu siuariartortinnerata qinersisartut tapersersoraluarpaat.

Macronilli tapersersuisui ikileriarput. Taannami kingusinaarluni qineqqusaalerpoq ataasiaannarlu qinersisartunik naapitsinermik aaqqissuussaqarluni. Taakkua saniatigut soraarnerussutisiaqalernissanut ukiut amerlineqarnissaat qinersisartunit nuannarineqanngeqisoq politikeraa.

Frankrigi nunat allat assigalugit akit qaffakkiartornerannik eqqugaavoq. Taamaattoqarnera Macronip unammillertaanut Marine Le Penimut iluaqutitaqarpoq.

Taanna Frankrigimi angalaarnermini qinersisartunik talerperliunerusunit tapersersorterpassuaqalerpoq.

- Piareersimavugut. Franskit tapersersorpaatigut, Le Pen qinersisartunik naapititsinermini sisamanngormat oqarpoq.

Præsidentimut qineqqusaartut aqqaneq-marluk ilaat qinersisartut affaannik qinersinerup siulliani qinerneqariataanngippat, taakku marluk qinersinerup aappaanut apriilip 24-ani pisussamut ingerlaqqissapput. Qinersinermi tassani kina præsindetinngussanersoq paasineqassaaq.