Folketingimut qinersineq 2015 Qinersineq imatut ingerlanneqassaaq
Qinersiviit ullaap tungaani qulingiluanut ammassapput unnugulu arfineq pingasut tungaannut qinersisoqarsinnaassalluni.
Illoqqortoormiuni najugaqaruit tassa maanna qinersiartorsinnaanngorputit, Nuummili najugaqaruit nalunaaquttap akunneri marluk suli utaqqisariaqassaatit.
Qinersivimmi qinigassanngortittut aqqi allattorsimassapput, taamaalillutillu qinerniakkavit aqqa imaluunniit partii qinerniakkat allassinnaassavat. Nunatsinni qinigassanngortittut partiinit assiginngitsunit tallimaneersut katillutik 17-iupput - partiit qinigassanngortitsisut tassaallutik Siumut, Partii Naleraq, Inuit Ataqatigiit, Atassut aamma Demokraatit.
Qinersivissami qinersivimmi tunniunneqartumi qinigassanngortittup partiilluunniit qinerniakkavit aqqa allassavat taannalu taasinernut ikioraavimmut nakkartiinnassavat.
Taava qinersinerit unnugu kisinneqarnissaat kisimi utaqqisaalissaaq.