Qinersineq: Allakkatigut

Qinersisartut Inatsisartunut novemberip ulluisa 15-ianni qinersinissami qinersinermut atatillugu ajornartorsiorlutik taasiartorfimmukarsinnaasut imaluunniit taasiartorfimmukarsinnaanngitsut pappiaqqamik allakkatigut taasivimmik nassiussuinermikkut taasinissaminnut ullumikkumiit periarfissaqalerput.

Qinersisartoq kommunip angerlarsimaffigisami avataaniikkuni inuit nalunaarsorsimaffianni allakkatigut taasissutikkut taasisinnaavoq.

Napparsimmavinni, peqqissartarfinni paaqqutarineqartarfinniluunniit uninngasut – aamma pinerluuteqarsimasunik inissiisarfiini inissinneqarsimasut – allakkatigut taasisinnaapput.

Qinersisartut inoqarfinni mikinerusuni najugaqartut inummi Qinersinermut siulersuisut toqqagaanni allakkatigut taasisinnaapput.

Qinersisartut umiarsuarni Kalaallit Nunaanni angerlarsimaffeqarsinnaasut umiarsuup naalagaanit taassumaluunniit toqqagaanit taasisinneqarsinnaapput.

Silasiorfinni timmisartunullu mittarfinni allakkatigut taasisoqarsinnaavoq inummi Qinersinermut ataatsimiititaliamit piginnaatinneqartumi.

Qinersisartut Danmarkimiittut Savalimmiuniittulluunniit inuit nalunaarsorsimaffianni imaluunniit Kalaallit Nunaata sinniisoqarfiani Københavnimiittumi allakkatigut taasisinnaapput.

Qinersisartut Naalagaaffiup avataaniittut Danmarkip aallartitaqarfiini imaluunniit konsuleqarfiini taasisinnaapput.