Meeqqat pillugit ataatsimoortumik aaqqiineq, partiit pingasut suleqatigiilernerat kiisalu kalaallit kulturiata oqaasiisalu pingaartinneqarnerulernissaat partiitoqqat pingasut naalakkersuisooqatigiilernissaminnik isumaqatigiissutaanni nutaartarpiaasutut isigisariaqartut, partiit isumaqatigiinniartui isumaqarput. Tamanna erserpoq KNR-radiup Inatsisartunut qinersineq 2005 pillugu unnummut arferngup tungaanut aallakaatitaani:
Kuupik Kliest IA:
- Isumaqarpunga meeqqanut tunngasunut isumaqatigiissusiornitsinni ilusilerneqarnera nutaartaasoq, meeqqanut tunngasut ataatsimoortillugit isumaqatigiinniutigigatsigit.
Steffen Silassan, Atassut:
- Partiit pingasunngorlutik isumaqatigiinnialernerat amma nutaaliornertut Atassummit isigaarput.
Michael Petersen, Siumut:
- Pingaaruteqarluinnarsimavoq inuiattut pingaartitatta isumaqatigiissutigineqarneri. Ilaatigut oqaatsitsinnik atuinerulernissaq, allaffeqarfinnik ingerlatsinikkut eqaallisaanissaq kalaallillu oqaasiisa allafeqarfinni atugaanerulernissaat, sulisunillu kalaallisut oqalussinnaanngitsunik ilinniartitsisalernissaq nutaartaapput.