Kim Kielsen Nuup qeqqani arfininngormat ualikkut qineqqusaartoq.Assi: Helle Nørrelund/ KNR

Qinersilivinnermi: Kielsenip Siumumi siulittaasunngorniaqqissinnaanini ammatikkaa

Siumumi suli siulittaasuuniuuteqaat. Kim Kielsenip qinersinerup kingorna siulittaasunngorniarsinnaanini itigarteriinngilaa.

Siumumi kina siulittaasuussanersoq, qinersiviit matunissaanut ulloq ataasiinanngortoq, aaqqiagiinngittoqarpoq. 

Siumukkut novemberimi ataatsimeersuarneranni, Kim Kielsen, parteeqqatiminiit siulittaasuujunnaarsinneqartoq, siulittaasunngorlaammut, Erik Jensenimut, unammillersinnaalluarpoq.

Erik Jensenip Siumulluunniit qinigassanngortitaata allap qinersinermi qanoq taaguunneqartiginera apeqqutaatinnagu, Erik Jensen siulittaasuussasoq, Siumup siulittaasuata tulliata, Inga-Dora G. Markussenip ataasinngornermi erseqqissarpaa, taamaalilluni partiimi eqqissiviilliortoqarunaassasoq oqarluni.

Partiimi siulittaasuunikup tamanna isumaqatiginngilaa. Erik Jensenimiit amerlanerusunik qinerneqassaguni, Kim Kielsen, Siumumi siulittaasunngorniaqqissinnaanissani tunuarsimaarfiginngilaa.

Immikkut ittumik ataatsimeersuarneq

Erik Jensenimiit amerlanernik qinerneqassaguni, Siumukkut immikkut ittumik ataatsimeersuaratarsinnaasut, Kim Kielsen, KNR-imut oqarpoq.

- Tassa uani immikkut ittumik ataatsimeersuartoqarsinnaanera eqqaamaneqartariaqarpoq, taanna oqarpoq.

Kisianni 2009-mi qinersinermi Aleqa Hammond taamani siulittaasuusumit Hans Enoksenimit taaguunneqarneruvoq. Taava Hans Enoksen qinersinerup kingorna tunuarpoq, Aleqa Hammondilu immikkut ittumik ataatsimeersuarnermi Siumut siulittaasunngorpoq. Ilisimaneqartutullu Naalakkersuisunut siulittaasunngorpoq, soorlu Kim Kielsen tassani inissisimasoq – inissisimaffik iperarusunngisaa, naak Erik Jensen partiimini naalakkersuisunut siuttuusumi siulittaasuussutut inissiiffigiumagaluaraa.

Qinersisartut aalajangiissasut

Erik Jensenimik sooq erseqqisumik tapersersuinnginnersoq aperigatsinni, apeqqut qoqasseeriaatanerarpaa akerusunnagulu, oqarlunili:  

- Kina oqarpa, Kim Kielsenip imaluunniit Erik Jensen Inatsisartunut isissasut? Qinersisartut aqagu tamanna isummerfigiumaarpaat. Aamma imaassinnaavoq alla amerlanernit qinerneqartoq. Kisianni qinersisartut oqariartuutaat ataqqineqassaaq.

- Erik Jensen Siumup maannakkut siulittaasorivaa. Siumumi qanoq inissisimasoqalissasoq qinersinerup kingorna takutikkumaarpaa. 

Sooruna Erik Jensenimut tapersersuinngilit?

- Oqareerpunga: Siumumi ataatsimoortoqassaaq. 

Massakkut taamaappisi?

- Qinersinermi uani Siumut ataatsimuussaaq.

 Qinersiliivinnermimi ataatsimoortutut inissisimavisi?

- Siumut ataatsimuussaaq, Kim Kielsen, erseqqissaavoq.

Isummersuutit

Nannumik assiliisoq © Vilhelm Lynge Hard

TV, radio: Qinersisartunik ataatsimiititsinerit

INATSISARTUNUT QINERSINEQ #IQ2021

Illoqarfinni assigiinngitsuni qinersisartunik ataatsimiititsinerit tv-kkut radiukkullu aallakaatilerpagut.

Sumiiffiit ornillugit imaluunniit Facebookimi quppernitsinni KNR-imi Qinersinermi apeqquteqarnissamut periarfissaqarputit:

facebook.com/qinersineq

Pilersaarutit uani takukkit