Qinersilerpugut

septembarip 16-at 2005 06:13

- Qinersisoqassaaq novemberip 22-ani 2005, qilaannaassaavullu. Aamma neriappunga inuiaqatigiit taasiartorluarumaartut periarfissarlu atorluarumaaraat isummersornissaminnut.

Naalakkersuisut siulittaasuat Siumumeersoq Hans Enoksen ippassaq unnukkut taama suaaruteqarpoq, tamanna pivoq, aningaasanut inatsisissaq aappaagumoortoq, Siumut Inuit Ataqatigiillu ippassaq unnukkut isumaqatigiissutiginngitsoormassuk.

- Partiinik isumaqateqarnissarput soorunami pingaartissimavara, partiittali piumasaa naalakkersuisooqatigiinnermilu isumaqatigiissutip malitsinneqarnissaa akisussaaffigaara. Taamaattumik isumaqatigiissutivut tunuinnarlugit siunnerfeqarnissarput attassinnaannginnakku qinersinissamik suaaruteqarpunga, Hans Enoksen nassuiaavoq.

Naalakkersuisooqatigiit aningaasanut inatsisissamut isumaqatigiinngissutigisimasaat ilaatigut tassaapput, meeqqanut sipaagaqartitsinissaq, allaffissuarmik pisiniarneq kiisalu friskolemik pilersitsiniarneq.

- Taakku peqataaffigerusussimanngilavut, ilaatigut meeqqat atuarfiinik iluarsaanissaq akissaqartinngitsutut ilillugu allaffissuarnik pisiortornissarput Siumumi attassinnaasimannginnatsigu, Hans Enoksen erseqqissaavoq.

Hans Enoksenip qinersinissamut piumasaqaat Inatsisartut siulittaasuannut tunniuttussanngorpaa, allakkallu taakku tunngavigalugit Inatsisartut aggersarneqassapput.